«Соргулаах суорумньу» кэмиэдьийэ олох сытыы боппуруостарыгар болҕомтону тардар

Саха тыйаатырын үтүө санааланыы бырайыагын чэрчитинэн тыйаатыр уонна «Күн барыбытыгар тыгар» көрбөттөр уопсастыбалара кыттыһан туруорбут «Соргулаах суорумньу» кэмиэдьийэлэрин кыра саалаҕа ыгыччы мустубут дьон олус сэргии көрдүлэр.


Испэктээк иннинэ туруорааччы режиссер СӨ үтүөлээх артыыската Прасковья Адамова мустубут дьоҥҥо кэлбиттэригэр махтанна уонна бэртээхэй айымньыны дуоһуйа көрөллөрүгэр, ытыстарын тыаһынан улахан сценаҕа саҥа сүрэхтэнэр артыыскалары өйүүллэригэр ыҥырда. «Күн барыбытыгар тыгар» уопсастыба артыыскалара суорумньуһут Лөглөйө Аана оруолун толорбут Алена Васильева, Кубарыйа Маасаны оонньообут Надежда Васильева Туйууна диэн бастыҥ ынахтаах, нарын бэйэлээх Маанньа буолбут Елизавета Захарова, сытыыканнаах Мотоһуйа Морууса буолан эппит-саҥарбыт, эбиитин иэйиилээхтик ыллаабыт Василиса Мартынова бастаан долгуйбуттарын ытыс таһыныытыттан эрдийэн умнан, улам ууларыгар-хаардарыгар киирэн оонньоотулар. Оонньуулларыттан астыналлара, оруолларын ис сүрэхтэриттэн ылыналлара көрөөччү сүрэҕэр тиийдэ дии саныыбын. Оттон кэргэнэ суох сылдьыбыт тыа улаттарын: Ырыган бухатыыр диэн ааттаммыт булчуту СӨ үтүөлээх артыыһа Куприян Михайлов, тоҕус ынахтаах, тыа сиригэр баайынан биллэр Томтойо холостуойу СӨ артыыһа Михаил Апросимов оонньообуттарын көрөөччүлэр биһирээтилэр. Суорумньу обургу араас албастарынан үс кэргэнэ суох кыыска холоонноох доҕордорун булларан, сыһыаннарын ыпсаран биэрэр.

Испэктээк бүтүүтэ көрөөччүлэр улаханнык астыммыттарын биллэрэн артыыстары сибэкки дьөрбөтүнэн киэргэттилэр, өссө минньигэс туордунан күндүлээтилэр. Пьеса ааптара Саха сирин ааҕааччыларыгар тыа олоҕун туһунан кэрэхсэбиллээх кэпсээннэринэн киэҥник биллибит Дмитрий Наумов артыыстарга, режиссерга махталын биллэрдэ уонна көрөөччүлэргэ бу кэмиэдьийэ эрээри, кэргэннэнии хас биирдии нэһилиэк тыҥаан турар кыһалҕата буолбутун тоһоҕолоон эттэ. Онон кэмиэдьийэ көрбөттөр уопсастыбаларыгар эрэ буолбакка, бүгүҥҥү олохпут биир сытыы боппуруоһугар болҕомтону тардар. Манна даҕатан эттэххэ, Дмитрий Наумов «Соргулаах суорумньу» пьесата иллэрээ сыл Театральнай деятеллэр сойуустара тэрийбит драматурдар күрэстэригэр биһирэммитэ.

This post was published on 15.02.2017 15:03 15:03