Кыайыы күнүгэр биллиилээх «Земляне» рок-бөлөх Өймөкөөн улууһун Уус Ньара бөһүөлэгин «Металлург» Култуура дьиэтигэр кэнсиэртээтэ.
«Земляне» сэбиэскэй кэм саҕана оччотооҕу эстрадаҕа рок-музыка элэмиэннэрин аан бастакынан киллэрбитэ. Кинилэр биллибит уонна норуот кутун туппут ырыаларын «Трава у дома», «Каскадеры», «Прости, земля», «Маленький кораблик», «Путь домой», «Каратэ» толордулар.
Санатар буоллахха, рок-бөлөх Өймөкөөн оройуонугар саамай элбэх көмүһү хостуур «Янтарь» хампаанньа көҕүлээһининэн, өйөбүлүнэн кэллэ. «Земляне» рок- бөлөх сүрүн солиһа (фронмент), сэбиэскэй кэм уонна Россия биллиилээх рок-музыкана Сергей Скачков аатырбыт, биллибит хиттарын толордо.
«Эдэр сылдьан сөбүлээн истибит бөлөхпүн бу тутан олорон көрдүм, иһиттим. Олус үчүгэй, сүргэм көтөҕүлүннэ. Кинилэр ырыалара патриотическэй ис хоһоонноохтор, Ийэ дойдуну көмүскүүргэ ыҥыраллар. Аны туран, тыыннаах доҕуһуол, тыыннаах куолас…», — диэн санаатын үллэһиннэ Уус Ньара бөһүөлэгин олохтооҕо Иван Алексеев.
«Земляне» бөлөх сүрүн солиһа Сергей Скачков этэринэн, Саха сиригэр кини маҥнайгы сырыыта буолар. «Москваттан бэрт уһуннук айаннаан кэллибит. Сөмөлүөтүнэн көтөн иһэн көрдөххө, Өймөкөөн хайалара олус кырасыабайдар, адьас уратытык көстөллөр. Сарсын Өймөкөөн ураты айылҕатын кытта алтыһыахтаахпын. Хомойуох иһин, аан дойду биир ураты Лабыҥкыр күөлүн көрбөт эбиппин, ырааҕа бэрт диэтилэр. Түгэнинэн туһанан, Саха сирин ытык-мааны олохтоохторун Улуу Кыайыы күнүнэн ис сүрэхпиттэн эҕэрдэлиибин! Россия хайа да түгэҥҥэ өлөн-охтон биэриэ суоҕа», — диэтэ кини.
* * *
Россияҕа маннык биллэр-көстөр бөлөхтөр, ырыаһыттар Өймөкөөн Уус Ньаратыгар кэлэн кэнсиэртээн бараллара үтүө үгэскэ кубулуйда. Кинилэри «Янтарь» хампаанньа ыҥыран аҕалар. Икки сыллааҕыта Россия күнүгэр «Белый орел» бөлөх Уус Ньара бөһүөлэгин стадионугар кэнсиэртээбитэ.
Быйыл Россия күнүгэр, бэс ыйын 12-тигэр Уус Ньара олохтоохторун эҕэрдэлии Вика Цыганова кэлиэхтээх.
https://youtu.be/xIltxAxU0q0
