Бу күннэргэ халааҥҥа эмсэҕэлээбит улуустарга көмөлөһөр сыаллаах араас ис хоһоонноох тэрээһиннэр ыытыллаллар.
Кэрэхсэбиллээҕэ баар, ыччаттар кэккэ сонун аахсыйалары, бырайыактары тэрийэн эрэллэр. Бу туһунан биир бэртээхэй идиэйэ ааптара, Горнай улууһун ыччата Василий Григорьевы кытта кэпсэттим.
— Мин аммалар күтүөттэрэбин. Табаарыспынаан Амма ыччата Владислав Федоровтыын халаан алдьархайыттан эмсэҕэлээбит Амма, Уус-Маайа, Таатта улуустарын олохтоохторугар үбүнэн көмөлөһөр соруктаах #паводок2018мысвами диэн аһымал аахсыйаны тэрийдибит. Тэрээһин ис хоһооно — силикон эрэһиинэттэн оҥоһуллубут браслеты эргиэн тэрилтэлэригэр атыылаттарыы. Табаар атыытын харчыта халаантан эмсэҕэлээбит улуустар счеттарыгар барыаҕа.
Бүгүҥҥү күҥҥэ икки тэрилтэни кытта кэпсэтэн, 3500 уст. силикон браслеты үлэһэн оҥоттордубут. Биһиги бырайыакпытын Мэҥэ Хаҥалас улууһуттан, Амматтан төрүттээх биллиилээх предприниматель Руслан Федотов (500 уст.) уонна Дьокуускайтан кофе атыылыыр Travelers coffee тэрилтэ салайааччыта предприниматель Виктор Гилевич (3 тыһ. уст.) өйөөннөр, маҕаһыыннарыгар браслеттары атыылатыахтара. Ол эбэтэр хас биирдии атыылаһааччы халааҥҥа бэйэтин тус көмөтүн оҥорбутун бу браслет бигэргэтиэҕэ. Үлэхпитин үөрэтэн көрө таарыйа, сакаастаабыт тэрилтэлэр ааттарын браслекка суруттардыбыт. Холобур, Руслан Федотов атыылаһааччылара бу тэрилтэ килийиэннэрэ буолаллара бу оҥоһуктан биллэр буолуоҕа.
Өскө табаарбыт үчүгэйдик бардаҕына, атын да тэрилтэлэргэ маннык «фирменнэй» браслеттары сакаастыахпыт. Кылаабынайа, бу оҥоһуктар атырдьах ыйын 31 күнүгэр диэри атыыга баран иһиэхтэрин наада.
Ол курдук, бастакы үлэхпит барыта атыыланнаҕына, халааҥҥа эмсэҕэлээбит улуустарга 350 тыһ. солк. хомулла түһэр. Атыылаабыт тэрилтэ ол харчыны халааҥҥа түбэспит улуус счетугар ыытар. Онон сирэй харчыны ким да көрбөт, барыта кумааҕынан отчуоттанар. Биһиги сакаасчыппытын Нижнэй Новгородтааҕы «Браслет-сервис» ХЭТ кытта номнуо дуогабар түһэрсэн, үлэбитин саҕалаатыбыт.
Сотору кэминэн сакааспыт Москванан эргийэн (быһа рейс суох), Дьокуускайга кэлиэҕэ. Барыта ааҕыы-суот, отчуот.
Дьоммут: «Сакааскытын бу ыыттыбыт», — диэн хаартысканан отчуоттаатылар. Онон курууспутун кэтэһэ олоробут.
Уус-Маайа, Таатта уонна Амма улуустара бэйэ-бэйэлэрин өйөһөр инниттэн, үс өрүттээх дуогабардары түһэрсибиттэрэ. Онон бу аахсыйа сүнньүнэн киирбит үбү бу үс улууһунан араарарбыт буолуо. Биһиэхэ Таатта ыччата Василий Данилов кыттыста. Кини «Марсель» диэн миэбэл оҥорор сыахтаах. Онно биир хоһу офис курдук биһиэхэ туран биэрдэ. Онон үлэлиирбитигэр усулуобуйа баар. Мин «Мясоруб» диэн кафеҕа пуобардыы сылдьан, бу аахсыйаны олоххо киллэрэр соруктаах быстах үлэҕэ көстүм. Бырайыакпыт санаа хоту табыллара буоллар, атырдьах ыйын 31 күнүгэр диэри халаантан эмсэҕэлээбит улуустар счеттарыгар дьоһуннаах көмө оҥоhуллуо этэ. Онон бу ыстатыйаны аахпыт дьон, бука диэн, бу бэрт судургу эрээри, олус дириҥ ис хоһоонноох аахсыйаны өйүүргүтүгэр көрдөһөбүн. Эһиги силикон браслеты 100 солк. атыыластаххытына, бу харчыгыт халааҥҥа эмсэҕэлээбит улуустар социальнай эбийиэктэрин, суолларын чөлүгэр түһэриигэ туттулуоҕа. Онтон эһиги тус бэйэҕит тугунан да кэмнэммэт дьоһуннаах кылааккытын киллэрэҕит.
… Дьэ, онон, доҕоттор, ыччаттарбыт барахсаттар халааҥҥа эмсэҕэлээбит улуустарга көмөлөһөр соруктаах араас бырайыактары олоххо килэриигэ дьулуһууларын өйүүргүтүгэр ыҥырабыт!
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Василий Григорьев түһэриитэ.
