29 Кулун тутар 29.03
  • -14°
  • $ 92,26
  • 99,71

Сииттэлэр сарсыҥҥыга бигэ эрэллээхтэр

Читайте нас на
Яндекс Новости
ЯДВ

Кэбээйи улууһун Сииттэтигэр оҥорон таһаарыы көрдөрүүтэ үрдүүр, ыччат нэһилиэккэ сөбүлээн олохсуйар. Манна дьон-сэргэ инникилэрин торумнууллар, онно көхтөөхтүк кытталлар, өрөспүүбүлүкэтээҕи бырагыраамаларга кыттыһан итилэри олоххо киллэрэллэр. Биһиги инникибит бэйэбит үлэбититтэн, түмсүүлээхпититтэн быһаччы тутулуктаах. Ити туһунан СИА-ҕа кинилэр этэллэр.


Бүгүҥҥү Сииттэҕэ 500-тэн тахса киһи олорор, мантан баһыйар үксэ – ыччат. Сииттэ Дьокуускайтан 250 км ыраах баар, урукку өттүгэр Нам улууһугар, онтон 1937 сыллаахха саҥа тэриллибит Кэбээйи улууһун састаабыгар киирбитэ.

Сииттэҕэ газ ситимэ киириэҕиттэн ыла, оҥорон таһаарыы көрдөрүүтэ биллэ үрдээбит. Нэһилиэккэ сэттэ фермерскэй хаһаайыстыба баар, онно 305 төбө сүөһүнү, 232 сылгыны көрөллөр-харайаллар. Нэһилиэккэ баар машиннай-технологическай станция (МТС) эбии аһылыгы оҥорор. Фермердэр хаһаайыстыбаларын хаҥатар санаалаахтар.

Сэбиэскэй кэмҥэ «Сииттэтээҕи» миллионер-сопхуос баара. Сопхуос 1000 төбө сүөһүлээҕэ. 90-с сыллардааҕы уларыйыылар сопхуоска содула суох ааспатахтара.

Газ киириэҕиттэн 2007 сылтан бэттэх нэһилиэккэ саҥа кэрдиис кэм саҕаламмыта. Өрөспүүбүлүкэ былааһын өйөбүлүнэн олорор дьиэлэр гаас ситимигэр холбоммуттара, 2010 сыллаахха Саха сиригэр аан бастакы гаас микротурбиннай станцията үлэтин саҕалаабыта. Ити түмүгэр эниэргийэ нэһилиэнньэҕэ быыстала суох бэриллэр буолбута.

Сииттэлэр быйыл сайын быһа холуйан 2,2 тыһ.тонна оту оттоотулар, итинтэн 1,2 тыһ.тонната өрөспүүбүлүкэ страховой резервэтигэр киирэр. Бу күннэргэ 118 тонна оту Нам, Горнай улуустарыгар ыыттылар.

«Эбии аһылык базатын хаҥатар санаалаахпыт. Бу көрдөрүүнүн өрө таһаарар соруктаах үлэлиибит-хамсыыбыт.Эбии аһылыгы дэлэтэр, атыылыыр толору кыахтаахпыт. Сүрүн кыһалҕабыт оттуур сирдэри оҥотторууга түмүллэр. Тоҕо диэтэххэ, сирбит баһыйар үксэ ураты харыстанар сирдэр ахсааннарыгар киирэр», — диэн быйыл бу дуоһунаска үлэлии саҥа кэлбит баһылык Айсен Захаров СИА-ҕа кэпсээтэ.

Оҕо саадыгар улахан кыһалҕа баар. Билигин манна 35 оҕо сылдьар. Дьыссаат өссө 1957 сыллаахха тутуллубут, оҕону көрүүгэ-харайыыга сөбө суох, саахалланар кутталлаах эбийиэккэ үлэлиир.

Кэлиҥҥи уон сылга ыччат дойдутугар эргиллэн кэлэн олохсуйара элбээтэ, онон оҕо да эбиллэ турар. 2015 сылга 80 үөрэнээччигэ анаммыт икки этээстээх орто оскуола тутуллубут, эмиэ ити сылга аныгы малынан-салынан ситэриллибит спорт саалата үлэтин саҕалаабыта.

Эдэр ыаллар тыа хаһаайыстыбатын министиэристибэтин олорор дьиэни тутууга анаммыт бырагыраамаларыгар кытталлар. Бүгүҥҥү туругунан уон ыал судаарыстыба көмөтүнэн туһанар бырааптаммыт.

Атын нэһилиэктэргэ курдук, Сииттэҕэ предпринимателлэр бааллар. Кинилэр олохтоохтору аһынан-үөлүнэн, малынан-салынан хааччыйаллар. Быйылгыттан ыла Сииттэ чөл олохтоох нэһилиэк ахсааныгар киирбит.

Следите за самым важным и интересным в Telegram-канале и WhatsApp-группе ЯСИА