29 Кулун тутар 29.03
  • -12°
  • $ 92,26
  • 99,71

Сииттэ урбаанньыта биир дойдулаахтарын күннээҕи олохторун-дьаһахтарын тупсарар

Читайте нас на
Яндекс Новости
ЯДВ

Кэбээйи улууһун Сииттэ нэһилиэгэр кэскиллээх урбаанньыт Николаева Софья Денисовна 2009 сылтан арыйбыт маҕаһыына, 2011 сылтан үлэлэтэр бэкээринэтэ олохтоохтору араас табаарынан, минньигэс килиэбинэн, кондитерскай оҥоһуктарынан хааччыйар. Биир дойдулаахтарын олохторун-дьаһахтарын тупсарар мааны киһи туһунан Дабаан инстаграм-сирэйигэр суруйдулар.


Сииттэ урбаанньыта 2017 сылтан сибиинньэ иитиитинэн дьарыктанар. Бу үлэҕэ нэһилиэк элбэх оҕолоох аҕалара, ийэлэрэ үлэлииллэр. Онон нэһилиэккэ дьон-сэргэ дьарыктаах буолуутугар бу тэрилтэ улахан көмөнү оҥорор.

Софья Денисовна Николаева салайар тэрилтэтэ нэһилиэк ытык кырдьаҕастарыгар, элбэх оҕолоох ыалларыгар ураты бэлиэ күннэргэ минньигэс килиэби, торду босхо биэрэн бэлэх уунар. Маны таһынан нэһилиэккэ ыытыллар тэрээһиннэргэ спонсордаан дьону-сэргэни көҕүлүүр. Кырачааннарга сылын ахсын Оҕо көмүскэлин күнүгэр «минньигэс» бырааһынньыгы тэрийэллэр уонна Аан дойдутааҕы килиэп күнүнэн «Хлеб – всему голова» уруһуй күрэҕин ыытан оҕолорго кыра саастан килиэп суолтатын өйдүүргэ үлэлэһэллэр.

Бэйэ оҥорон таһаарыытыгар тэрилтэ улуус иһинэн ыытыллар атыы-эргиэн дьаарбаҥкатыгар өрүү бочуоттаах 1 миэстэни ылара бу тэрилтэ туһунан элбэҕи этэр. Софья Денисовна салайар тэрилтэтэ 60-тан тахса араас килиэп, буулка, кондитерскай оҥоһуктары оҥорон атыылыыр, араас дьаарбаҥкаларга көхтөөхтүк кыттан бочуоттаах миэстэҕэ тиксэр. Бу тэрилтэ оҥорон таһаарар аһа-үөлэ нэһилиэккэ эрэ буолбакка улуус нэһилиэктэригэр, Нам улууһугар кыһыҥҥы өттүгэр хамаҕатык баран дьон-сэргэ биһирэбилин ылар.

Эдэр эрчимнээх урбаанньыт дьоҕус бизнеһы тыа сиригэр арыныыга тус уопутун ыччат дьоҥҥо көрдөрөн, бу уустук кэмҥэ бэйэ дьыалатын өссө сайыннарар баҕа санаалаах үлэлии-хамсыы сылдьар.

Тыа сирин урбаанньыттара билиҥҥи ыарахан кэмҥэ чаҕыйбакка, саҕалаабыт дьыалаларын атаҕар туруорарга күн аайы дьаныардаахтык үлэлииллэр, нэһилиэк, улуус олоҕор, сайдыытыгар көхтөөхтүк кытталлар.

Следите за самым важным и интересным в Telegram-канале и WhatsApp-группе ЯСИА