Ааспыт нэдиэлэҕэ Смоленскайга бэтэрээннэр ортолоругар көҥүл тустууга дойду чөмпүйэнээтэ түмүктэннэ.
Манна Саха сириттэн сэттэ бөҕөс кытынна: бэтэрээннэр ортолоругар аан дойду икки төгүллээх чөмпүйүөнэ Семен Соркомов (62 кг, 41-45 саастаахтарга, Муома), Евгений Дьячковскай (62 кг, 35-40), хапсаҕайга СӨ маастара Алексей Некрасов (88 кг, 35-40, Дьокуускай), Герасим Дьяконов (70 кг, 51-55, Дьокуускай), аан дойду икки төгүллээх призера Валентин Константинов (70 кг, 61-65, Горнай), Николай Григорьев (78 кг, 61-65, Үөһээ Бүлүү) уонна бэтэрээннэр ортолоругар аан дойду түөрт төгүллээх призера Федот Соловьев (62 кг, 66-70, Дьокуускай).
Тустууктар саастарынан сэттэ бөлөххө наарданан 55-62, 70, 78, 88 итиэннэ 100-130 кг диэри ыйааһыннарга күрэс былдьастылар.
Күрэхтэһии түмүмгүнэн чөмпүйүөн аатын Семён Соркомов (62 кг) ылла. Федот Соловьев (62 кг), Николай Григорьев (78 кг), Валентин Константинов (70 кг), Герасим Дьяконов (70 кг) уонна Евгений Дьячковскай (62 кг) үрүҥ көмүс мэтээл хаһаайыннарынан буоллулар. Алексей Некрасов (88 кг) үһүс бириистээх миэстэҕэ таҕыста.
Роман Попов, «Саха сирэ» хаһыат, edersaas.ru
