Томпо улууһугар Улуу Кыайыы 71 сылын үс сэрии кыттыылааҕа көрүстэ, онтон иккитэ нуучча дьахталлара. Кинилэртэн Омскай уобаластан төрүттээх Ирина Прокопьевна Баженова ыам ыйын 10 күнүгэр 90 сааһын туолла.
Ирина Прокопьевна баара – суоҕа 17 саастааҕар 1943 сыллаахха армияҕа сулууспалыы барбыта. Кини атын эдэр кыргыттары кытта Читинскай уобалас Руша станциятыгар тааҥкалары, атын да техниканы уонна сэрии сэбин тиэммит эшелоннар ааһар муосталары уонна тимир суоллары харабылааһыҥҥа сылдьыбыта. Байыаннай кэмҥэ кытаанах бэрээдэги, кэмчи аһылыгы, ситэ утуйбат буолууну барытын тулуйарга күһэллибиттэрэ. Ити барыта кыайыы туһугар оҥоһулларын өйдүүллэрэ. «Сэрии бүттэ!» — диэн командирдара эппитин «Ураа!» хаһыынан көрсүбүттэрэ. Ирина Прокопьевна армияттан 1945 сыл балаҕан ыйыгар демобилизацияламмыта.
Бэтэрээн түөһүн «Германияны кыайыы иһин», «Японияны кыайыы иһин», «1941 – 1945 сс. Аҕа дойду Улуу сэриитигэр килбиэннэх үлэтин иһин» уонна юбилейнай мэтээллэр киэргэтэллэр.
Сэрии бэтэрээнэ 1995 сылтан Томпо улууһун киинигэр – Хаандыга бөһүөлэгэр кэлэн уолун аттыгар олорор. 2014 сылга Улуу Кыайыы 69 сылыгар Томпо улууһугар баар Аҕа дойду Улуу сэриитин алта кыттыылаахтарыгар, ол иһигэр И.П. Баженоваҕа Томпо улууһун бочуоттаах олохтооҕун аата иҥэриллибитэ.
Ирина Прокопьевнаҕа 90 сааһынан улуус салайааччылара мустан олордохторуна Томпо улууһун баһылыга Георгий Герасимов махтал сурук уонна бэлэх туттарда.
