Хаҥалас улууһун «Уус-Буотама» питомнигар анал бөлөх тахсан бизоннары үөрэттилэр, чинчийдилэр. Маныаха ыраахтан аҕалыллыбыт бизоннар айылҕабыт уратытын атыҥыраабакка хара маҥнайгыттан төрөөн-ууһаан барбыттара чинчийээччилэри кэрэхсэтэр.
ХИФУ Хоту сир прикладной экологиятын научнай-чинчийэр институтун дириэктэрэ Григорий Саввинов иһитиннэрбитинэн, «Сравнительный анализ ДНК ископаемых и современных лесных бизонов Якутии» бырайыагынан үлэ ыытыллыбыт. Ол эбэтэр, Саха сиригэр сэлии үйэтин саҕана үөскүү сылдьыбыт бизоннар аныгы үйэ бизоннарын кытта майгылаһар өрүттэрин көрдүүллэр, чинчийэллэр. Тириилэриттэн, түүлэриттэн уонна хааннарыттан анаалыс ылбыттар. Итини сэргэ, ХИФУ сэлии музейыгар былыргы үйэтээҕи бизоннар коллекцияларын кытта тэҥнииллэр, үөрэтэллэр. Үлэ түмүгэ сыл курдугунан биллиэхтээх.
Анал бөлөххө СӨ айылҕа харыстабылын миниистирин солбуйааччы Яков Сивцев, биология наукатын дуоктара, ХИФУ Хоту сир прикладной экологиятын научнай-чинчийэр институтун дириэктэрэ Григорий Саввинов, биология наукатыгар кандидат, ХИФУ сэлии музейын сэбиэдиссэйэ Семен Григорьев, СӨ айылҕа харыстабылын министиэристибэтин ураты харыстанар сиргэ-уокка уонна биологическай ресурсаларга Управление начаалынньыгын солбуйааччы Роман Сметанин, Соҕуруу Кэриэйэ Сеул куоратыттан кэлбит бырапыассар, ветеринария дуоктара, SOOAM биотехнологическай чинчийиигэ пуонданы салайар Хванг Ву Сок, пуонда үлэһитэ Ким Дэвид кыттыбыттар.
Санатан аастахха, СӨ айылҕа харыстабылын министиэристибэтэ 2006 сыллаахха «Элк Айленд» (Канада) национальнай пааркаттан Саха сиригэр аан маҥнай 30 бизону аҕалбыта. 2011 уонна 2013 сылларга эмиэ итиччэ ойуур кыыла айаннаан кэлбитэ. Бизоннар маҥнайгы төрүөхтэрин 2008 сыллаахха биэрбиттэрэ. Бу кыыллар «Уус-Буотамаҕа» уонна Горнай улууһугар «Тыымпынайга» бааллар.
