Үөһээ Бүлүү оройуонуттан сэриигэ ыҥырыллыбыт, Сэбиэскэй Сойуус Дьоруойа Алексей Афанасьевич Миронов Венгрияҕа харалла сытар көмүс уҥуоҕар сибэкки дьөрбөтө уурулунна. Биир дойдулаахтара — кэнтиктэр — кыттыгас аахсыйалара Аҕа дойду улуу сэриитин хорсун буойуттарыгар өйдөбүнньүк бэлиэтинэн буолар.
Сэбиэскэй Сойуус Дьоруойа Алексей Афанасьевич Миронов биһигин ыйаабыт дойдута — Үөһээ Бүлүү оройуонун Кэнтик нэһилиэгэ. Биир дойдулаахтара кини Аҕа дойду улуу сэриитигэр Эйэлээх олох иһин туруулаһыыга Сэбиэскэй Сойуус Дьоруойа муҥутуур үрдүк ааты ылбытынан киэн тутталлар. Нэһилиэк олохтоохторо чулуу уолларын олоҕун чинчийиигэ, кинини үйэтитиигэ бэйэлэрин кылааттарын киллэрэллэрэ хайҕаллаах, махталлаах.
Кэнтик нэһилиэгин библиотекатын сэбиэдиссэйэ Мария Захаровна Ущницкая, быйыл Улуу Кыайыы үбүлүөйдээх 75 сылын көрсө, Венгрияҕа харалла сытар Алексей Миронов көмүс уҥуоҕар сибэкки дьөрбөтүн уурар туһунан этии киллэрбитэ. «Венгрия Будапешт куоратыгар олорор, Саха сириттэн төрүттээх Анна Протопоповаҕа Кэнтик дьонун аатыттан көрдөһүү сурук суруйбуппут. Кинини Саха сирин Тас дойдуну кытта сыһыаннаһыыларын министиэристибэтин нөҥүө булбуппут. Анна Протопопова тутатына сөбүлэҥин биэрэн үөрдүбүтэ. Ол эрэн коронавируһунан хааччахтааһын миэрэлэрин тутуһан, Анна бэйэтэ барар кыаҕа суоҕа. Ол иһин Алексей Миронов көмүллэ сытар кылабыыһатыттан чугас олорор, эмиэ Саха Сириттэн төрүттээх Чуприна Галина Лаврентьевнаттан көрдөспүтэ. Галина Лаврентьевна көрдөһүүнү ылынан, ыам ыйын 9 күнүгэр, кэргэнин кытары сержант Алексей Афанасьевич Миронов көмүллэ сытар уҥуоҕар сибэкки дьөрбөтүн уурдулар. Онон кинилэр бүтүн Саха сирин аатыттан махталбытын, сүгүрүйүүбүтүн тиэртилэр«, — диэн кини долгуйан туран кэпсээтэ.
Бырайыак ааптарыгар маҥнай утаа, саха чулуу буойунун уҥуоҕар сибэкки дьөрбөтүн кытары ийэ буорун илдьэр туһунан санаа үөскээбит. Хомойуох иһин, сыстыганнаах ыарыы бүтүн дойду үрдүнэн сатараан, ийэ буорун илдьэр кыаллыбата. Ол да буоллар, кэнчээри ыччат туһугар сырдык тыынын кэрэйбэтэх саха чулуу уолугар, Сэбиэскэй Сойуус Дьоруойугар Алексей Афанасьевич Мироновка сүгүрүйүү сиэрэ-туома ыытылынна.
«Мария Ущницкаяҕа, Анна Протопоповаҕа, Галина Чупринаҕа бу үтүө санааҕыт, хайҕаллаах дьыалаҕыт иһин Алексей Афанасьевич биир дойдулаахтарын ааттарыттан улахан махтал! Эйэлээх үрүҥ күн анныгар олорорбутугар саха хорсун саллааттара үтүөкэн өҥөлөөхтөр, бүгүҥҥү дьоллоох олох иһин сырдык тыыннарын толук уурбут тугунан да кэмнэммэт сүдү бэлэхтээхтэр… Кинилэр Албан ааттарыгар сүгүрүйэр, кинилэри үйэтитэр биһиги кэнчээри ыччат ытык иэстээхпит«, — диэн санааларын тириэрдэллэр үөһээ бүлүүлэр.
