Ассоциация бэрэсидьиэнэ, “Туймаада” АУо генеральнай дириэктэрин солбуйааччы Александр Артемьев этэринэн, улуустардааҕы ассоциациялар салалталара уонна үлэлэрэ сөргүтүллүбүтүн түмүгэр быйылгы ыһыахха өрөспүүбүлүкэ улуустарыттан көхтөөхтүк кытталлара күүтүллэр. Сылга биирдэ тэриллэр улахан дьаһал киин куоракка ыытылларынан, сүрүн эппиэтинэс Дьокуускай куораттааҕы тыа хаһаайыстыбатын управлениетыгар (салайааччы Николай Афанасьев) уонна киин куорат фермердэрин, кэпэрэтииптэрин түмсүүтүгэр (бэрэссэдээтэл Надежда Шелковникова) сүктэриллэр.
Ыһыах ыалдьыттара түһүлгэҕэ улуустарынан сэлэлии хаамсан киириэхтэрэ. Уйгулаах сайыны уруйдуур сиэри-туому Хатастааҕы Култуура киинин үлэһиттэрэ тэрийэн ыытыахтара. Онтон АККОР бэрэсидьиэнэ Александр Артемьев, тыа хаһаайыстыбатын миниистирин э. т. Александр Атласов уонна Дьокуускай куораттааҕы тыа хаһаайыстыбатын управлениетын салайааччыта Николай Афанасьев бырааһынньыгынан эҕэрдэлиэхтэрэ, чулуу көрдөрүүлээх бааһынайдарга наҕараадалары туттарыахтара. Тупсаҕай түһүлгэ, төрүт ас-таҥас, ырыа-оһуохай бастыҥнарын сыаналаах бириистэр күүтэллэр. Кыргыттарга, дьахталларга “Алаас алаадьыта”, уолаттарга, эр дьоҥҥо “Кус быһый, ат бөҕө” күөн күрэстэр тэриллиэхтэрэ. Күрэхтэһии бириистэрин улуустардааҕы ассоциациялар уйуналлар. Ону таһынан өрөспүүбүлүкэ ааттаах-суоллаах фермердэрэ бэйэлэрин бириистэрин туруоруохтара.
Василий НИКИФОРОВ, «Саха сирэ» хаһыат, edersaas.ru
