Ыам ыйын 5 күнэ. Күммүт сандаара тыган, киһи эрэ сүргэтэ көтөҕүллүөх күнэ үүннэ.
Айылҕа бэйэтэ айхаллаабыт маннык мааны күнүгэр, Дьокуускай Сайсарытыгар, «Тээйэ» банкеттыыр саалаҕа «Сааскы сарыаллар» диэн Поэзия дьоро киэһэтигэр хомоҕой хоһоону суруйар, айар-тутар дьоммут муһунна.
Бу киэһэ Сахабыт сирин тарбахха баттанар биир саамай талааннаах поэтессатыныын — Саргылаана Гольдерова-Саргы Куолуун көрүстүбүт.
Биэчэри бэрт истиҥник иилээн-саҕалаан Екатерина Борисова ыытта.
Кини, маннык дьоро киэһэлэри бар дьонноругар олус үөрэн-көтөн туран тэрийэллэрин кылгастык билиһиннэрээт, тылы долгуйа күүппүт поэтессабытыгар Саргылаана Гольдероваҕа биэрдэ.
Саргы Куо «Киһи — кэм айанньыта. Кутунан-сүрүнэн күнү-дьылы, кэми-кэрдиини кытта тэҥҥэ айанныыр, үйэлэри да уҥуордуур…», — диэн, намыын куолаһынан саҕалаан, айар аартыкка хайдах үктэммитин салгыы сиһилии кэпсээн, саалаҕа мустубут дьонун болҕомтотун тутта. Ис иһиттэн иэйэн-куойан, бэйэтин хоһооннорун ааҕан иһитиннэрдэ.
Бу киэһэ алгыстаах эҕэрдэ тыллара этилиннилэр.
СӨ Суруйааччыларын сойууһун чилиэнэ, «Күрүлгэн» сурунаал сүрүн эрэдээктэрэ Афанасий Гуринов-Арчылан бастакынан тыл эттэ, сэмэй бэлэхтэрин туттарда.
Амматтан төрүттээх, күөрэгэй ырыатын кэриэтэ дьүрүһүтэ ыллыыр саха Далбар Хотуна — Дойдууна Белолюбская-Окорокова эҕэрдэ ырыатынан барыбыт сүргэбитин көтөхтө.
Салгыы, «Кырсаада» ансаамбыл эҕэрдэлии таҕыста. “Кырсаадалар” Саргы Куо хоһооннорун доргуччу аахтылар, сибэкки дьөрбөтүн утары ууннулар уонна Аграфена Павлова тылларыгар, Валентина Яковлева-Чэлгийээнэ мелодиятыгар «Дьүөгэлэрим» диэн ырыаны иэйиилээхтик ыллаан, мустубут дьону сэҥээртилэр.
Бу дьоро киэһэ «Амма» түмсүү чилиэннэрэ кэлэннэр, бэйэлэрин кыыстарыгар ис сүрэхтэн тахсар эҕэрдэлэрин эттилэр, “илии тутуурдаах, өттүк харалаах” кэлэннэр, үөрдэ — көтүтэ бэлэхтэрин туттардылар.
Кинилэр «Тохтообокко ардах түһэр» диэн Саргы Куо хоһоонугар мелодистка Светлана Петрова суруйбут үгүс көлүөнэ сөбүлээн ыллыыр ырыатын толордулар.
Саргылаана Гольдерова-Саргы Куо хоһоонноругар уопсайа 20-тэн тахса кэрэ ырыа айыллыбыт.
Дьоро киэһэ ыалдьыттара бары да бэйэлэрин талааннарынан сөхтөрдүлэр. Ол курдук, Сахабыт сиригэр биир биллэр-көстөр киһибит Иван Дьячковскай-Кыталык Уйбаан кэргэнинээн кэккэлэһэн тахсаннар, иккиэн ырыаларын бэлэхтээтилэр, эҕэрдэ истиҥин эттилэр.
Дьоро киэһэҕэ этиэн-тыыныан, ыллыан-туойуон баҕалаахтар барҕа баһаамнарын көрдөрдүлэр.
Онон салгыы «Көҥүл микрофон» диэн биллэрбиттэригэр этээччи-тыынааччы өссө элбээтэ. Ылбаҕай ырыа хойукка диэри дьиэрэйдэ, хомоҕой хоһоон элбэхтэ ааҕылынна.
Төрөөбүт тылбытын өрө тутан, поэзияҕа сүгүрүйээччилэр маннык истиҥ киэһэлэргэ, сайа тыынан, санаа атастаһан, үөрэ — көтө көрсөрбүт үчүгэйиэн!
Галина БАСЫЛАЙКАНОВА-Кэнтик кыыһа,
«Кырсаада» ансаамбыл салайааччыта.