Сардаана Трофимова кыайыыта Олимпиадаҕа кынаттыыр

Олимпийскай көрүҥҥэ аан дойдутааҕы кылаастаах спорт маастарын нуорматын толорбут, Саха сирин, итиэннэ Тулуз, Уфа, Волгоград, Москва куораттар тыраассаларын рекордсменката, Үөһээ Бүлүү Тамалакаанын кыыһа Сардаана Трофимова өссө биир кыһыл көмүс мэтээли түөһүгэр иилинэн кылабачытта. Былырыыҥҥы көрдөрүүтэ 2 чаас 30 мүнүүтэ 32 сөкүүндэ эбит буоллаҕына, быйылгыта – 2 чаас 28 мүнүүтэ 35 сөкүүндэ. Стартан  эр дьоннуун, дьахтардыын барыта 30 тыһыынча быһый атахтаах бииргэ түһүммүттэрэ, Сардаана дьахталларга кыайыы кынаттаах биэтэккэ соҕотох сүүрэн кэлбитэ. Иккискэ Татьяна Архипова (2:35:08), үһүскэ Мария Осокина (2:37:31) тигистилэр.  

— Сардаана, стартка тахсаргар төһө долгуйбуккунуй? Кыайыыга эрэл баара дуо?

— Бэйэбэр эрэллээҕим, тоҕо диэтэххэ, туох баар дьарыкпыт былырыыҥҥы рекордпун куоһарар соруктаах ааспыта. Ол эрэн, утарсааччым — 2012 сылаахха Лондоҥҥа ыытыллыбыт олимпиадаҕа боруонса мэтээллээх Татьяна Архипова күүстээх спортсменка буолан, «бастыыр туһугар син эриһэрбит дуу?» дии санаабытым. Онтон уон килэмиэтири сүүрбүппүт кэннэ, кэннибэр хаалбыта.

— Хаһыс килэмиэтиргэ кыайдым дии санаабыккыный?

— Финиш чугаһыгар, 37 килэмиэтири аастахха эргийии (разворот) кэлэр, онно эргиллэн дьонуҥ ханан сүүрэн иһэллэрин көрүөххэ сөп. Онно Татьяна Архипова тоҕо эрэ көстүбэт этэ, ол аата лаппа хаалбыт буолуон сөп.

— Кыайыыгынан бастакынан кимнээх эҕэрдэлээтилэр?

— Биэтэккэ кэлбиппэр аан бастаан тириэньэрим Татьяна Жиркова эҕэрдэлии көрсүбүтэ. Харах уулаах үөрүү-көтүү биһиэхэ этэ. Сүүрэ барарбар төлөпүөммүн палаткаҕа хаалларан барбытым, чаас курдугунан тиийбитим дьон бөҕө эрийбит этэ. Аан бастакынан дойдубар Тамалакааҥҥа олорор убайбар Игнат Ивановичка эрийбитим, онтон ийэбэр, аймахтарбар.

— Туох да диэбит иһин, 42 килэмиэтир уһун дистанция, биһиги курдук туох да эрчиллиитэ суох дьон оннук ыраахха хааман да тиийэрбит саарбах. Төһө эһинниҥ, өссө салгыы сүүрэр кыах баара дуу?

— Кыра эстии баара, тоҕо диэтэххэ, дистанция иккис аҥаара сыырдардаах баҕайы этэ, дабайыыларга атаҕым олорон хаалбыта, аны тымныы күн этэ, итинниккэ киһи былчыҥа күүрэн хаалар эбит. Эбиитин ити күн ардыа диэн биллэрбиттэрэ, дьолго, күүскэ ардаабатаҕа эрээри, ибирдээбитэ, онон асфальт барыта инчэйэн, халтыраана сүрдээх этэ, кыра дьаамалар уунан туолбуттара, охтубатарбын ханнык диэн санаа олох өйбүттэн арахпат этэ. Ол эрэн, дьарыгым үчүгэй, кыайыыга баҕам күүстээх буолан, итиэннэ аттыбар сүүрэ сылдьар көмөлөһөөччү пейсмейкер уолаттарым Руслан Хорошилов уонна Ренат Кашапов тыалы бүөлээн, уу биэрэн кыайыыны эрэллээхтик ситистэҕим.

— Олимпиада туһунан, өссө биирдэ кэпсэтиэх эрэ.

— Арассыыйа сүүрүктэрин норуоттар икки ардыларынааҕы таһымнаах  күрэхтэргэ кыттарбытын суругунан көҥүллүү иликтэр, онон Олимпиада туһунан этэр арыый эрдэ. Дьиҥэ, саамай улахан баҕа санаам – олимпиада түһүлгэтигэр сүүрүү этэ буоллаҕа…

— Билигин ханна бааргыный?

— Ыарахан, элбэх күүһү-уоҕу эрэйэр күрэх кэннэ, билигин Банкокка (Таилаҥҥа) баарбын, эппин-сииммин, доруобуйабын чөлүгэр түһэрэр сүүмэрдэниигэ сылдьабын.

— Инникитин туох улахан күрэх күүтэрий?

— Аны саас Арассыыйа чөмпүйэнээтэ күүтэр, онно бэлэмнэниэхпит. Уопсайынан, сүүрэр дьон дьарыктарын хаһан да бырахпаттар ээ, сүүрэ үөрэнэн хаалаҕын, организм бэйэтэ ирдиир курдук буолар. Саха сиригэр алтынньы 11 күнүгэр биирдэ тиийэбин, онтон сэтинньи бүтүүтэ Киргизияҕа сүүмэрдэнэ барабын.

Кэпсэттэ Валентина Догоюсова