29 Кулун тутар 29.03
  • -15°
  • $ 92,37
  • 99,53

Санкт-Петербурга уонна Ленинградка үөрэммиттэр Ассоциациялара тэрилиннэ

Читайте нас на
Яндекс Новости
ЯДВ

Саха сирин уонна Санкт-Петербург икки ардыгар үйэлэри уҥуордаан кэлбит дьыалабыай, социальнай-култуурунай сибээс дьиҥ төрүтэ баар. Чуолаан Петербургтан, онтон кэлин Ленинградтан Хотугу муора суола арыллыбыта, экспедициялар айаннаабыттара, сиртэн хостонор баай үөрэтиллиитигэр учуонайдар кыттыбыттара.


Санкт-Петербург Саха сирин бастыҥ кадрдарын үөрэтэр кыһатынан буолар. Тыһыынчанан уолаттар, кыргыттар онно үрдүк үөрэҕи бүтэрэн, наука үктэлин дабайан, дойдуларыгар төннөн кэлэн үлэлииллэр. Хас биирдиилэрэ үөрэммит сирдэрин умнубаттар, бииргэ үөрэммит доҕотторун кытта сибээһи ыһыктыбаттар.

Ыам ыйын 26 күнүгэр гуманитарнай чинчийиилэр уонна аҕыйах ахсааннаах хотугу норуоттар институттарын дьиэтигэр мунньахтаан, Ленинград — Санкт Петербург үрдүк үөрэх кыһаларын уонна научнай-чинчийэр институттарын бүтэрбиттэр Саха сиринээҕи Ассоциациялара тэрилиннэ. Көҕүлээччилэринэн уонна тэрийээччилэринэн онно араас кэмҥэ үөрэммит, билигин Саха сирэ сайдыытыгар үлэлии-хамсыы сылдьар дьон буолаллар.

Уопсай мунньах Ассоциация бэрэссэдээтэлинэн Санкт-Петербургтааҕы инженернэй-экономическай университеты 2005 сыллаахха бүтэрбит, 2004-2008 сылларга «Сайдыы» Санкт-Петербурга ыччат уопсастыбаннай тэрилтэтин бэрэссэдээтэлинэн үлэлээбит Алексей Павловы таллылар.

Ассоциация бастакы үлэтин ыам ыйын 28 күнүгэр Үс Хатыҥҥа Санкт-Петербург куорат төрөөбүт күнүн тэрийииттэн саҕалаата. Манна этиллибит алгыс бары көлүөнэни холбоото уонна Ассоциация үлэтингэр суолу аста. Бу күн мустан ирэ-хоро кэпсэттилэр, концерт көрдүлэр, СӨ профессиональнай үөрэхтээһиҥҥэ, кадры бэлэмнээһиҥҥэ уонна аттарыыга министиэристибэ Кубогар спортивнай күрэхтэһиилэр ыытылыннылар.

Бырааһынньык кыттыылаахтарын көрдөһүүтүнэн, бу тэрээһин сылын аайы ыытыллыа. Билигин Ассоциация Санкт-Петербург үрдүк үөрэҕин 2016 сыллаахха бүтэрээччилэргэ, эдэр исписэлиистэргэ көмөлөһөр сыаллаах үлэтин саҕалаата.

Уопсастыбаннай тэрилтэ үтүө дьыаланы саҕалыырыгар кинилэри өйөөбүт тэрилтэлэргэ махталларын тириэртилэр уонна чуолаан 1984 сыллаахха А.И. Герцен аатынан Ленинградтааҕы педагогика судаарыстыбаннай институтун выпускнигар Юрий Куприяновка тус махталларын эттилэр.

Следите за самым важным и интересным в Telegram-канале и WhatsApp-группе ЯСИА