Саха сирин судаарыстыбаннаһын күнүн дойду араас муннуктарыгар олорор сахалар эмиэ көрүстүбүт. Санкт-Петербурга Саха сирин бастайааннай бэрэстэбиитэлистибэтин тэрийиитинэн, балаҕан ыйын 27 күнүгэр Смоленскай кылабыыһаҕа саха суругун-бичигин төрүттээччи, учуонай-лингвист Семен Новгородов көмүс уҥуоҕар тыыннаах сибэкки дьөрбөтө уурулунна, төрөөбүт дойдутун ыччата кини суолтатын өрө тутарын көрдөрдө.


Саха сирин судаарыстыбаннаһын күнэ хас биирдии сахаҕа ураты суолталаах күнүнэн буолар. Уһук хоту кыраайга тутулуга суох буолууну ылыныы кытаанах быһаарыныы этэ. Төһө да модун Россия састаабыгар кииристэрбит, омук быһыытынан уратыбытын, сыаннаспытын тутан хаалыыбыт, инники соргулаах дьаһал буолбутун бүгүҥҥү күн ырылхайдык көрдөрөр.

Быйыл өрөспүүбүлүкэ күнэ өссө биир бэлиэ түгэни кытта дьүөрэлэннэ. Биир сыл анараа өттүгэр норуот куоластааһынынан, Саха сирин Ил Дарханынан Айсен Николаев талыллыбыта уонна өрөспүүбүлүкэ салалтатын уруулугар эрэллээхтик турбута.

Бу бэлиэ түгэни дойду араас муннуктарыгар олорор сахалар эмиэ көрүстүбүт. Санкт-Петербурга Саха сирин баста    айааннай бэрэстэбиитэлистибэтин тэрийиитинэн, балаҕан ыйын 27 күнүгэр Смоленскай кылабыыһаҕа саха суругун-бичигин төрүттээччи, учуонай-лингвист Семен Новгородов көмүс уҥуоҕар тыыннаах сибэкки дьөрбөтө уурулунна, төрөөбүт дойдутун ыччата кини суолтатын өрө тутарын көрдөрдө.

Бу күн быйыл дойду култуурунай киинигэр үөрэнэ кэлбит араас үөрэх тэрилтэлэрин устудьуоннарын түмэ тардар, куорат уопсастыбаннай олоҕор, биир дойдулаахтар түмсүүлэрин кытта билиһиннэрэр сыаллаах көрсүһүү буолла. Манна Саха сирин бастайааннай бэрэстэбиитэлистибэтэ уонна Арктика дьыалаларыгар кэмитиэт устудьуоннарга үлэлэрин туһунан билиһиннэрдилэр, өрөспүүбүлүкэ туһугар үөрэнэргэ, үлэлииргэ ыҥырдылар. Ону таһынан куруук бииргэ түмсэн, сүбэлэһэн-амалаһан олорорго ыҥырдылар.

Салгыы эдэр оҕолорго Петербург куоракка айымньылаахтык үлэлиир “Сайдыы” устудьуоннар түмсүүлэрин кыттааччылара, бэрэссэдээтэл Лена Максимова Саха сирин историятын туһунан викторина тэрийдэ. Көрсүһүү түмүгэр оҕолор төрөөбүт дойдуларыгар сылдьар курдук сананнылар, бэйэ-бэйэлэрин кытта билсэн, салгыы сибээһи тутарга эрэллэрин биллэрдилэр.

Өрөспүүбүлүкэ күнүн салгыы бэлиэтээһин балаҕан ыйын 28 күнүгэр аатырбыт “Ленфильм” киинэ устуудьуйатыгар тэрилиннэ. Саала муҥунан толору мустубут биир дойдулаахтар ортолоругар үөрүүлээх быһыыга-майгыга судаарыстыбаннай наҕараадалары туттарааһын буолла.

Бырабыыталыстыба кыраамататынан уонна көмүс чаһынан СӨ култууратын үтүөлээх үлэһитэ, телерадиосуруналыыстыкатын бэтэрээнэ, олоҕун 42 сылын “Саха” НКиК сайдыытыгар анаабыт Валентина Прибыткина бэлиэтэннэ.

Ил Дархан эҕэрдэ тылын бэрэстэбиитэлистибэ сэбиэтинньигэ Станислав Константинов аахта уонна салгыы “Гражданскай килбиэн” бэлиэни космофизика бэтэрээнэ Виолетта Рыбниковаҕа туттарда.

Бэрэстэбиитэлистибэ кыраамататын Санкт-Петербург куоракка олорор биир дойдулаахтар түмсүүлэрин бэрэссэдээтэлэ Гаврил Троев уонна Уопсастыбаннай сэбиэт бэрэссэдэтээлэ Сергей Сидоров туттулар.

Салгыы Эдуард Новиков “Тойон кыыл” уус-уран киинэтин көрүү буолла.

Ааптар: Анфиса СЛЕПЦОВА, РФ суруналыыстарын сойууһун чилиэнэ, Санкт-Петербург к.

Сигэн:

3
0

Хоруй суох