«Самыртай» ТХПК (Тиит Эбэ) дириэктэрэ Егор Владимирович Аммосов уонна «Индустрия будущего» тэрилтэ салайааччыта Иван Васильевич Степанов көҕүлээһиннэринэн ыччакка анаммыт саҥа бырайыак үлэҕэ киирдэ. Эппиэтинэстээх куратордарынан “Академия Новаторства” хамаандата буолла. 


Самыртайга олоххо киирбит бырайыак «Точка кипения» киинигэр бөлөҕүнэн үлэ түмүгэр үөскээбитэ.

Билигин үлэһит ордук тиийбэт салаата — тыа хаһаайыстыбата. Ыччат тыаҕа тахсан үлэлиир улахан баҕата суох. Онон бу уустук кыһалҕаны быһаарарга көмө буолуо диэн бырайыагы тыа хаһаайыстыбатыттан саҕалаатылар.

Дьокуускайдааҕы Сервис технологическай техникумун маҥнайгы кууруһун устудьуоннара “Hard Skills” уонна “SoftSkills” бырагыраамаларынан үлэлиэхтэрэ. “Hard Skills” («Профессиональнай сатабыл») бырагырааматыгар эттэн полуфабрикат уонна оҕуруот аһын түргэнник тоҥоруу, дьиэ хаһаайыстыбатыгар үлэни үөрэтиэхтэрэ.

“SoftSkills” (Надпрофессиональнай сатабыллар) — 4к-коммуникабельность, хамаанданан үлэ, креативность, коллаборация, мотивация уонна эмоциональнай интеллект хайысхаларын баһылыахтаахтар. Бырайыагы инникитин тыа сирэ саҥа моделыгар тиийэ кэҥэтиллэр туһунан санаа баар. Билигин бырайыагы көҕүлээччилэр уонна кинилэр көмөлөһөөччүлэрэ үлэлииргэ анаан, Тиит Эбэҕэ дьиэ бэлэмнээтилэр.

Аан маҥнайгы бырайыакка кыттааччыларынан «Сервис» технологическай техникумун устудьуонкалара Антонова Евдокия, Зедгенизова Нюргуяна, Никонова Наталья, Олесова Айталина, Семенова Алексия, Федорова Уйгууна, Филиппова Карина, Новгородова Алена буоллулар.

Ааптар: Анастасия Мордовская, «Хаҥалас» хаһыат общ.корр.

0
0
comments powered by HyperComments