Саха Өрөспүүбүлүкэтин аҕа баһылыга Айсен Николаев Саха Өрөспүүбүлүкэтин социальнай-экономическай сайдыытын кэскиллээх хайысхаларыгар анал Дьаһалын таһаарбыта. Ол иһигэр өрөспүүбүлүкэбит үөрэҕириитин сайдыытын кэскиллээх тускуллара киирбиттэрэ Саха сирин олохтоохторун сэҥээриитин, биһирэбилин ылла. Эбээн Бытантай улууһун Р.И. Шадрин аатынан Саккырыыр орто оскуолатын дириэктэрэ Афанасий Федоров Ил Дархан дьаһалын эмиэ биһириир.
Эбээн Бытантайга үөрэҕирии салаата өрөспүүбүлүкэҕэ дьоһун миэстэни ылар. Уһук хоту сытар улуус бары таһымнаах күрэхтэргэ актыыбынайдык кыттар, үөрэхтээһиҥҥэ улахаг болҕомтотун уурар. Саккырыыр орто оскуолатын дириэктэрэ «Арассыыйа Федерациятын үөрэҕин тэрилтэтин бастыҥ салайааччыта» аат хаһаайына Афанасий Федоров Ил Дархан дьаһалын туһунансанаатын үллэстэр:
— Бу дьыл сэтинньи 22 күнүгэр Өрөспүүбүлүкэбит Ил Дарханын «Саха Өрөспүүбүлүкэтигэр үөрэҕирии сайдыытын тускуллара» диэн дьаһалын биһиги, ыраах сытар хотугу улуустар үөрэҕириитин тэрилтэлэрин үлэһиттэрэ билсэн, үөрэтэн көрөн баран улаханных биһириирбитин биллэрэбит. Барыта киһиэхэ өйдөнөр гына суруллубут. Биһиги оскуолабытыгар өбүгэ төрүт үгэстэрин, олохтоох норуоттарын тылларын үөрэтии үөрэх былааныгар киирэн турар. Ол курдук «Основы северного оленеводства» предмет быһыытынан бэриллэр. Эбээн тылын үөрэтиитэ 1 кылаастан 11-кэ дылы нэдиэлэҕэ 4 чаас бэриллэр.
Оҕолор дьоҕурдарын сайыннарыыга, учууталлар билиилэрин-көрүүлэрин үрдэтиигэ туһуламмыт тэрээһиннэр биһиги киин сиртэн ыраах сытарбыт быһыытынан, үп-харчы тиийбэтинэн, дистанционнай форманан (видеоконференция) ыытыллара көдьүүстээх буолуо эбит. Биһиги оскуолабыт бу хайысханан үлэҕэ бастакы хардыылары оҥордубут.
Ол курдук, сэтинньи 29 күнүгэр онлайн маастар-кылаастаах бастакы сессияны ыыттыбыт. Дьокуускай куораттааҕы лицей, национальнай гимназия, Саккырыыр орто оскуолатын учууталлара кыттыыны ыллылар. Маннык тэрээһини ыытыы хайысхата салгыы тупсан, чочуллан, ис хоһооно кэҥээн сайдан иһиэн баҕарабыт, киин эрэгийиэннэри да кытта сибээс олохтуурга бэрт буолуо эбит, — диэтэ кини.
Дьаһал 2.10 пуунугар этиллэр 2024 сылга Аан дойдутааҕы научнай-образовательнай кииннэр тэриллиилэрэ соһуччу өрө көтүүгэ тэҥнээх буолуоҕа диир Афанасий Павлович. Онно эрдэттэн бэлэмнэнэн ыраах сытар хоту сир оскуолатыгар, чуолаан биһиги оскуолабытыгар английскай тылы дириҥэтэн үөрэтиини саҕалыыр бу кэм ирдэбилэ диэн санаатын этэр. Хотугу улуустарга биир сиргэ кииннээн анал IT-оскуола арылларын наадалааҕынан ааҕар.
— Биһиги усулуобуйабытыгар саамай сөптөөх, актуальнай боппуруос быһаарыллыыта дьаһал 2.13.4 пуунугар этиллибит. Хотугу оскуолалар олох түргэн тэтимигэр сөп түбэһиннэрэн тэбис-тэҥҥэ сайдыыларыгар бастакы уочарат күүстээх исписэлиистэринэн хааччыллыы уонна түргэн, хаачыстыбалаах интернет ситимэ баар буолуута наада, — диир Саккырыыр оскуолатын директора.
Ааптар: Сардаана Копырина, «Бытантай уоттара» хаһыат
