Сайтпытыгар бу дьыл тохсунньу 10 күнүгэр «Сайсары оройуонугар дьахталлары халаабыт киһини туттулар» диэн иһитиннэриим бэчээттэммитэ. Ол халабырдьыкка суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрдэ.
Дьыала ис хоһоонун санаттахха, ааспыт сыл ахсынньы ыйын ортотуттан уулуссаҕа анаан-минээн дьон суумкатын «бултаһа» тахсыбыт халабырдьыты полиция оперативниктара тохсунньу 7 күнүгэр туппуттара.
Ол курдук, 2016 сыл ахсынньы 19 күнүгэр полицияҕа биир кыыс эрийэн, Ильменскай уулуссатыгар киниттэн суумкатын былдьаабыттарын туһунан тыллаабыт. Суумкатыгар 7 тыһ. солк. баара үһү.
Ахсынньы 22 күнүгэр бу халабырдьыт аны Каландаришвили уулуссатыгар биир дьахтарга саба түһэн, эмиэ суумкатын былдьаабыт. Онно суотабай төлөпүөн уонна харчы баарын тута бараабыт.
Ахсынньы 26 күнүгэр халабырдьыт Сайсары күөлүнэн туораан испит дьахтары халаабыт.
Онтон саҥа сылга үктэнэн баран, салгыы бырааһынньыктыырыгар харчыга наадыйан, тохсунньу 4 күнүгэр ити күөлгэ кэлэн, эмиэ биир дьахтары халаан, «бултуйбут» харчытын мыынан, Ново-Карьерная уулуссаҕа баран, өссө биир дьахтарга саба түспүт.
Эмсэҕэлээбит дьахталлар көмөлөрүнэн, полицейскайдар уорбаланааччы мэтириэтин оҥорон, барытыгар биир киһи сылдьарын быһаарбыттар. Итиэннэ ити оройуоҥҥа күннэри-түүннэри кэтээбиттэр, киниэхэ маарынныыр дьону бэрэбиэркэлээбиттэр. Оперативниктар эрэ буолбакка, патруллуур-постовой сулууспа полицейскайдара эмиэ.
Дьэ, уонна тохсунньу 7 күнүгэр, Лонгинов уулуссатыгар халаабыт кыыһа көмөҕө ыҥырбытын чугас сылдьар полицейскайдар истэн, ити оройуону иилээннэр, халабырдьыт хаарга бырахпыт суумкатын тэйиччи тэлгэһэттэн булбуттар.
Кинологтар ол суумканы ыттарыгар сытырҕатан, аттынааҕы дьиэ подъеһыгар тиийбиттэр. Уонна биир кыбартыыраттан бөрөстүүпүнньүгү булан ылбыттар. Халаппыт кыыс кинини тута билбит.
Ити иннинэ «халааһын» ыстатыйанан тэриллибит холуобунай дьыалалар бары биир дьыалаҕа холбоммуттара.
Сууттанааччы — ааспыт сыл атырдьах ыйыгар хаайыыттан босхоломмут киин куорат 31 саастаах олохтооҕо. Халааһыҥҥа барытыгар арыгы иһэн баран тахсыбыт.
Халабырдьыт ити оҥорбут буруйдарынан эмсэҕэлээччилэргэ уопсайа 44.300 солк. суумалаах хоромньуну оҥорбут, силиэстийэ кэмигэр итинтэн 7.500 солк. харчыны эрэ төлөөбүт.
Суут мунньаҕар буруйа толору дакаастанан, суут кинини 4 сылга ураты эрэсиимнээх холуонньаҕа көҥүлүн быһарга уурбут, манна эбии биир сылга көҥүлэ хааччахтанар.
