«СахаТрансСтрой»ХЭУо генеральнай дириэктэригэр уонна «Өлүөхүмэ куорат» муниципальнай тэриллии дьаһалтатын икки үлэһитигэр «Түөкүннээһин» ыстатыйанан холуобунай дьыала тэрилиннэ.
СӨ Борокуратууратын пресс-сулууспата иһитиннэрбитинэн, Өлүөхүмэ борокуратуурата «Өлүөхүмэ куорат» муниципальнай тэриллии дьаһалтата бүддьүөт сокуонун төһө тутуһарын бэрэбиэркэлээбит.
Ол бэрэбиэркэ быһаарбытынан, 2017 сыл от ыйыгар улуус дьаһалтата уонна «СахаТрансСтрой» хааччахтаммыт эппиэтинэстээх уопсастыба (ХЭУО) 3 мөл. 200 тыһ. солк. тахса суумалаах муниципальнай контракт түһэрсибиттэр. Манна Өлүөхүмэ куорат суоллара өрөмүөннэниэхтээҕэ. Толоруу болдьоҕо — 2017 сыл балаҕан ыйын 29 күнүнэн быһыллыбыт.
Онуоха баара, ханнык да суолу өрөмүөннээһин үлэтэ ыытыллыбатаҕын үрдүнэн, уопсастыба салайааччыта дьаһалтаҕа 3 мөл. солк. тахса суумалаах үлэ толоруллубутун туһунан аахталары киллэрбит. Ону дьаһалта үлэһиттэрэ билэ-билэ, докумуоҥҥа илии баттаан ылбыттар. Ол түмүгэр, «Өлүөхүмэ куорат» муниципальнай тэриллиигэ ураты бөдөҥ суумалаах хоромньу оҥоһуллубут.
Борокуратуура бэрэбиэркэ матырыйаалларын силиэстийэлиир уорганнарга ыыппыт.
Ол түмүгэр, «СахаТрансСтрой» генеральнай дириэктэригэр уонна «Өлүөхүмэ куорат» муниципальнай тэриллии дьаһалтатын дуоһунастаах икки үлэһитигэр «Түөкүннээһин» ыстатыйанан холуобунай дьыала тэриллибит (РФ ХК 159-с ыст. 4-с чааһынан).
Холуобунай дьыаланы силиэстийэлээһин борокуратуура хонтуруолугар сылдьар.
