Бүгүн, алтынньы 5 күнүгэр, Сахациркэтигэр өрөспүүбүлүкэтээҕи “Якутия” уонна “Саха сирэ” хаһыаттар тэрийэр Сурутааччы күнүгэр кэнсиэр, бириистэр уонна маастар-кылаастар кэтэһэллэр.
Бырагыраамаҕа – биһиги таһаарыыларбыт суруналыыстарын кытта көрсүһүү, скандинавскай хаамыыны таптааччылар кулууптарыттан, фитнес-кулууптан, туоһунан тигии, сиэлтэн хатыы, туорду оҥоруу маастардарыттан маастар-кылаастар.
Сэргэх күн “ SakhamediaStart” кэнсиэринэн түмүктэниэҕэ, манна биллэр толорооччулар Лэгэнтэй, Леонид Анциферов, Санита Ай, Эрхан, Чаҕыл, Аскалон Павлов, Далаана, Байбал, Надина Эльпис, Сахаайа, “Добун”, “Туймаада”, “Өркөн” ансаамбыллар, “Завод” үҥкүү студията кыттыахтара.
Бу күн эстрада чаҕылхай сулустара эрэ буолбакка, “Сахамедиа” суруналыыстара эмиэ ыллыахтара.
Кэнсиэри Александр Бурнашев уонна Николай Гоголев, ону тэҥэ “Сахамедиа” суруналыыстара Розалия Борисова уонна Николай Попов иилээн-саҕалаан ыытыахтара. Кэнсиэргэ билиэт атыыласпыт киһи “Якутия” уонна “Саха сирэ” хаһыаттарга сыл аҥаардаах сурутууну бэлэх быһыытынан ылар. Биһиги сурутааччыларбыт сурутуу бүтүөр диэри “Саха сирэ” уонна “Якутия” хаһыаттарга биллэриини таһааттаралларыгар 25 % чэпчэтиинэн туһаныахтара.
Маны сэргэ бырааһынньык ыалдьыттара бириистэри сүүйүөхтэрэ, манна сертификаттар оонньонуохтара: “Виктори клиник” клиникаттан медицинскэй өҥө, “Кристалл” клиникаттан стоматологическай өҥө, “Айгуль” бородууксуйата уонна “Самородок” сөтүөлүүр бассейҥҥа босхо абонеменнар.
