Күрэхтэһии кэмигэр “Боотур” кулууп салайааччыта, уолатттар күрэстэрин тэрийсибит, кылаабынай судьуйанан үлэлээбит Иван Белолюбскайтан саҥа тэриллэр федерация туһунан кэпсииригэр көрдөстүм.
— Бу күннэргэ сахалыы многоборье федерациятын тэрийиигэ үлэлии-хамсыы сылдьабыт. Туһааннаах докумуоннары хомуйан, Юстиция министиэристибэтигэр түһэрбиппит. Регистрацияны аастахпытына, улуустартан дэлэгээттэри ыҥыран кэмпириэнсийэ ыытыахпыт, биир сүбэнэн инники үлэбит былаанын торумнуохпут. Билигин, “Офсет” тэрилтэ дириэктэрэ Алексей Скобелевтан федерация бэрэсидьиэнинэн буоларга сөбүлэҥин ыламмыт, үлэбитин саҕалаан эрэбит. Ол бастакы хараҥаччыбытынан уолаттар ортолоругар бу өрөспүүбүлүкэтээҕи турнир буолла.
Сахалыы многоборьеҕа аны күһүҥҥүттэн эр дьоҥҥо, дьахталларга, оҕолорго күрэхтэһиилэри тэрийэн ыытар былааннаахпыт. Онно саҥа федерациябыт төһүү буолуоҕа. Балаҕан ыйыгар эр дьоҥҥо, дьахталларга өрөспүүбүлүкэ чөмпүйэнээттэрэ эмиэ биэс көрүҥҥэ ыытыллыахтара. Эр дьон мас тардыһыытыгар, хапсаҕайга, тутум эргииргэ, “үс төгүл үскэ” уонна 400 м сүүрүүгэ куоталаһыахтара. Кэрэ аҥардарбытыгар хапсаҕай оннугар “халбас харата” диэн эмиэ өбүгэлэрбит бэлэхтээн хаалларбыт оонньууларын – бэрэбинэҕэ туран охторсууну – киллэрэргэ былаанныыбыт.
Уолаттар күрэхтэһиилэрин туһунан этэр буоллахха, уонча тэҥ баайыылаах уол икки ардыгар биэс көрүҥҥэ сүрдээх хатыһыылаах киирсиилэр буоллулар. Манна төрүт оонньууларбытын түмпүт Манчаары Баһылай аатынан спорт национальнай көрүҥнэрин киинэ (Иннокентий Григорьев) баар буолан бары өттүнэн өйөбүллээх, тирэхтээх курдук сананабыт, онон бу сахалыы многоборьеҕа бастакы турнирбытын үрдүк таһымҥа ыыттыбыт диэн бэлиэтээн этиэхпин наада.
Роман Попов, “Саха сирэ” хаһыат
