НВК САХА — Саха сирин спортсменнара балаҕан ыйын 20-22 күннэригэр Благовещенскайга ыытыллыбыт Дойду үгэс буолбут көрүҥнэринэн күрэхтэһиитигэр бириистээх миэстэлэри ыллылар. Бу туһунан СӨ спортка министиэристибэтин пресс-сулууспата иһитиннэрэр.
«Күрэх сылын ахсын алта сиринэн түһүмэхтэринэн арахсан ыытыллар. Бастакы түһүмэх атырдьах ыйыгар Чувашия Чебоксары куоратыгар ааспыта. Курэхтэһии бырагыраамматыгар хотугу многоборьеттан икки көрүҥ киирбитэ: наарта үрдүнэн ыстаныы уонна мастаах сүүрүү. Үһүс көрүҥүнэн ыстаҥа буолла», — диэн тэрийээччилэр бэлиэтииллэр.
Күрэхтэһии иккис күнүн түмүгүнэн Ньургун Сокольников, Яков Дмитриев, Сайаана Уваровская уонна Айыына Салышева ыстаҥаҕа кыһыл көмүс мэтээллэри кыайдылар.
Мастаах сүүрүүгэ Михаил Соловьев кыайыыны ситистэ, Валентина Борисова уонна Алена Луковцева үрүҥ көмүс мэтээли кыайдылар, Алексей Созонов боруонса мэтээлгэ тигистэ.
Күрэхтэһиигэ Амурскай уобалас, Хабаровскай кыраай, Еврейскай автономнай уокурук, Ненецкай уонна Ямало-Ненецкай автономнай уокуруктар спортсменнара кытыннылар.
Источник: http://nvk-online.ru