Саха сирин салалтата киһи аймах историятыгар улахан хаан тохтуулаах сэрии саҕаламмыт күнүн ахтан-санаан ааста, олохторун толук уурбут дьон сырдык тыыннарын кэриэстээтэ.
«75 сыл аннараа өттүгэр өрөбүл күн этэ. Дойду дьоно эйэ дэмнээхтик утуйа сыттахтарына, 4 тыһыынча тааҥканан, 5 тыһыынча көтөр аалынан, 40 тыһыынча сэрии сэбинэн толору ситэриммит 5,5 мөлүйүөн киһи Сэбиэскэй Сойуус кыраныыссатын тоҕо көтөн киирбитэ.
Нус-хас, эйэлээх олоҕу атыйахтаах уулуу аймаабыт улахан алдьархайдаах, элбэх иэдээннээх сэрии саҕаламмыта. Уонунан мөлүйүөн киһи олоҕо бу сэриигэ быстыбыта», — диэн Егор Борисов Кыайыы болуоссатыгар мустубут дьоҥҥо туһаайан эттэ.
Егор Борисов Саха сирэ дойду бүтүннүүтүн иэдээниттэн туора турбакка, күргүөмүнэн кыттыбытын ойуччу тутан эттэ. Ол курдук, 60 тыһыынчаттан тахса киһи Ийэ дойдуларын көмүскүү сэриигэ туруммуттара.
«Мин өссө оҕо эрдэхпинэ ийэм бу сэрии саҕаламмыттын умнубаппар такайара. Бу күнү умнуу аньыыга тэҥнээҕин куруук санатара. Аҕа дойдуну көмүскүүр сэрии туһунан эттэхтэринэн, урукку эрэ туһунан буолбакка, инникини эмиэ саныахха наада. Россия судаарыстыбатыгар бүгүн арҕаа дойдулар кыһарыйыылара улахан. Политиктар дьон-сэргэ иннигэр эппиэтинэстэрин умналлар. Ол иһин, маннык ыгым кэм үөскээтэ. Биһиги сэриини эрдэттэн сэрэтиэхтээхпит. Биир сомоҕо буоламмыт, уйгуну-быйаҥы түстүүр эйэлээх соруктары быһаарыахтаахпыт», — диэн Егор Борисов салгыы эттэ.
Тыва өрөспүүбүлүкэтин Үрдүкү Хуралын бэрэссэдээтэлэ Кан-оол Даваа кини регионугар дьон эмиэ бүгүн маннык мустубутун эттэ. «Хараллыбакка хаалбыт бүтэһик саллааты булуохпутугар, кинини чиэстээн-бочуоттаан көмүөхпүтүгэр диэри сэрии өссө да биһиэхэ салҕанан барар», — диэтэ кини.
Аҕа дойду Улуу сэриитин кыттыылааҕа Петр Яковлев бүгүҥҥү тыҥааһыннаах быһыыны-майгыны санатта. «Бүгүн арҕаа дойдулар биһигини утары пропагандалыыр сэриини дьаныһан туран ыытыллар. НАТО дойдулара уонна кини хаһаайына АХШ Россия кыраныыссатыгар ыкса байыаннай үөрэҕи ыытыллар. Маннык усулуобуйаҕа Россия оборонатын күүһүрдүү соруга кытаанахтык турар. Ыччат иитиллибит Ийэ сирин, айыллыбыт Аҕа дойдутун, төрөөбүт төрүт буорун көмүскүү барыаҕар мин бүк эрэллээхпин», — диэтэ бэтэрээн.
Ыччат аатыттан устудьуон Юлия Калимова тылы ылла.
Тэрээһин бүтүүтэ мустубут дьон саҥата суох иһийэн турдулар, Кыайыы болуоссатын монуменыгар тыыннаах сибэкки дьөрбөтүн уурдулар.
