Бу субуотаҕа, олунньу 11 күнүгэр Д.П.Коркин аатынан Тустуу саалатыгар Николай Захаров-Сахаачча кэриэһигэр көҥүл тустууга өрөспүүбүлүкэ эдэрдэргэ (1997-1999 cc.) күрэхтэһиитэ ыытыллар. Бу күрэхтэһии түмүгүнэн Р.М.Дмитриев аатынан норуоттар икки ардыларынааҕы турнирга уонна Уһук Илин федеральнай уокурук чөмпүйэнээтигэр кыттар Саха сирин эдэрдэргэ хамаандата сүүмэрдэниэҕэ. Күрэхтэһии – 50, 55, 60, 66, 74, 84, 96, 120 кг ыйааһыннарга ыытыллар. Сиһилии edersaas.ru ааҕыҥ.
Былырыын маннык күрэхтэһии тохсунньу 22-23 күннэригэр Олимпийскай эрэл училищетын тустууга саалатыгар ыытыллыбыта. Онно барыта 84 эдэр бөҕөс күөн көрсүбүтэ.
Күрэхтэһиини үөрүүлээхтик аһыыга олимпийскай чөмпүйүөн Павел Пинигин:
“Мин сүгүрүйэр тустууктарбынан Вячеслав Карпов уонна Николай Захаров-Сахаачча буолаллар. Кинилэр чахчы талааннаах тустууктар. Биһиги атын омуктары кумир оҥостуо суохтаахпыт. Бэйэбитигэр холобур буолар, Роман Дмитриев, Александр Иванов, Герман Контоев, Леонид Спиридонов, Виктор Лебедев курдук, күүстээх бөҕөстөр элбэхтэр. Саха тустуута улахан таһымҥа таҕыста. Уолаттарга Россия, Европа, аан дойду чөмпүйүөннэрэ уонна призердара баар буоллулар. Кытаатан, ылыллыбыт үрдэли намтаппакка, өссө ситиһиилээхтик кыттарга ыҥырабын. Кылаабынайа, тустуу тиэхиньикэтин уонна тактикатын баһылыахха наада”.
Үөрүүлээх түгэҥҥэ саха бөҕөстөрүттэн бастакынан ССРС уолаттарга чөмпүйүөнэ буолбут Сахаачча истиҥ доҕоро Вячеслав Павлович Карповка уонна бииргэ төрөөбүт балта Анна Семеновнаҕа анал бэлиэлэр туттарыллыбыттара.
Кыайыылаахтарынан буоллулар: 50 кг – Максим Заморщиков (ОЭУ), 55 кг – Роберт Оконешников (Чурапчы), 60 кг – Семен Владимиров (ОЭУ), 66 кг – Эрхан Соркомов (ОЭУ), 74 кг – Софрон Софронов (ХИФУ), 84 кг – Максим Толмачев (ОЭУ), 96 кг – Никита Валеев (Дьокуускай), 120 кг – Никита Семенов (ХИФУ).
