29 Кулун тутар 29.03
  • -13°
  • $ 92,26
  • 99,71

Саха уолаттара Кыһыл болуоссакка Кыайыы параадыгар кыттыахтара

14:01, 04 мая 2017
Текст:
Читайте нас на
Яндекс Новости
ЯДВ

Соторутааҕыта саха уола дойдубут тэбэр сүрэҕэр Кыһыл болуоссакка Кыайыы параадыгар кыттар үһү диэн сурах өрөспүүбүлүкэни тилийэ көппүтэ. Бу кырдьык дуо?


Биллэрин курдук, Кыайыы параадыгар кыттыы – улахан чиэс. Дойду кыаҕын, күүһүн көрдөрөр сүдү тэрээһиҥҥэ талыллыбыттартан талыллыбыттар, бастыҥтан бастыҥнар кытталлар. Холобур, Москваҕа 1945 сыллаах Кыайыы параадыгар Саха сириттэн уоттаах сэрии кыргыһыытын ааспыт, Сталинград, Ленинград, Курскай Дуга мэһийиитин туораабыт, Берлиҥҥэ тиийбит буойуннартан 14 киһи кыттыбыта биллэр. Олор истэригэр аатырбыт снайпер, Сэбиэскэй Сойуус Дьоруойа Федор Охлопков баара.

Нам Арбынын уола Марк Колесов генерал В. Ф. Маргелов аатынан Суворов уордьаннаах Рязаннааҕы салгын-десантнай (ВДВ) училищеҕа үөрэнэ сылдьар. Бу РФ Оборона министиэристибэтин байыаннай үөрэҕин кыһата. Судаарыстыба сакааһынан салайар каадырдары, разведчиктары, техниктэри, о.д.а. бэлэмниир.

«Быраатым кыра эрдэҕиттэн байыаннай буолуон баҕарар этэ. 9-с кылаас кэнниттэн ханна үөрэнэ барарын быһаарыммыта, сыал туруорунан, эт-хаан өттүнэн анаан бэлэмнэммитэ»,  — диэн кэпсиир Марк бииргэ төрөөбүт убайа Станислав Колесов.

Марк икки сыллааҕыта оскуоланы бүтэрэн, Рязань куоракка баран, эксээмэннэри туттаран, тургутугу ааспыт. Убайынаан сылдьыбыттар, онтон  барытын этэҥҥэ туттаран, Марк онно хаалбыт. Быйыл иккис куурус, эһиил үөрэҕин бүтэрэр, ол кэнниттэн үрдэтинэр сыаллаах-соруктаах.

Станислав Колесов эппитинэн, Кыайыы параадыгар кытталлара тохсунньу ыйтан биллибит. Ол гынан баран, сорохторун сыыйан кэбиспиттэр. Ити курдук, хас да сыыйыыны ааһан, кини быррата кыттар буолбут. Марк үрдүк уҥуохтаах, эт-хаан өттүнэн үчүгэй бэлэмнээх, үөрэҕин да кыайа-хото тутар. Кинилэр Рязаннааҕы салгын-десантнай сэрии (ВДВ) кыаҕын, күүһүн көрдөрүөхтээхтэр.

«Билигин иллэрээ күнтэн Москваҕа бааллар, генеральнай эрэпэтииссийэҕэ бэлэмнэнии кытаанаҕа. Кинилэргэ төлөпүөн мээнэ көҥүллэммэт, иллэҥ буоллаҕына, өрөбүлүгэр бэйэтэ эрийээччи, — диэн кини кэпсээтэ.

Ону тэҥэ быйыл Кыайыы параадыгар эмиэ бу училище курсана, М.А. Алексеев аатынан Үөһээ Бүлүүтээҕи өрөспүүбүлүкэтээҕи лицей-интэринээт выпускнига Анатолий Ачикасов кыттаары бэлэмнэнэ сылдьар.

Уолаттарбытыгар ситиһиини баҕарыаҕыҥ! Аҕа дойдуну көмүскүүр Улуу сэриигэ дьоруойдуу быһыыны көрдөрбүт биир дойдулаахтарын туйахтарын хатаран, саха уолаттара, кинилэр ааттарын ааттата туруҥ! Оттон биһиги, ыам ыйын 9 күнүгэр Кыһыл болуоссакка Арассыыйа күүһүн, көмүскэллээх буолуутун көрдөрөр, хорсун буойуттарга сүгүрүйэр параад кэмигэр, итиннэ саха норуотун кылаата эмиэ баар диэн киэн тутта саныахпыт.

edersaas.ru
Хаартыскаҕа: иккис эрээккэ хаҥастан үһүс — Марк Колесов.

Следите за самым важным и интересным в Telegram-канале и WhatsApp-группе ЯСИА