Саха тыйаатырын үгэс буолбут сааскы гастроллара саҕаланнылар

0
34

Саха тыйаатырын быйылгы гастроллара федеральнай суолтан кытыы турар, сорох ардыгар суола-ииһэ мөлтөх нэһилиэктэри хабарынан уратыланна. Үгэс буолбут сааскы гастролларга үс биригээдэ үс хайысханан аттанна. 


Олунньу 20 күнүгэр СӨ үтүөлээх артыыһа Иннокентий Луковцев салайааччылаах биригээдэ Бүлүү, Үөһээ Бүлүү улуустарыгар айаннаабыта. Кинилэр Үөһээ Бүлүү улууһун Быракаан, Туобуйа, Кырыкый, Сургуулук Боотуулу, Мэйик, Далыр, Маҥаас нэһилиэктэригэр, Бүлүү улууһугар Тылгыны, Үгүлээт, Күүлэт, Кыргыдай, Балаҕаччы нэһилиэктэригэр сылдьыахтара. Бүлүү өрүс нөҥүө турар нэһилиэктэрин суола-ииһэ мөлтөҕүнэн, оттон Үөһээ Бүлүү нэһилиэктэрэ ыраахтарынан биллэр. Туобуйа курдук ыраах нэһилиэккэ Саха тыйаатыра хаһан даҕаны сылдьыбатах эбит. Онон артыыстары нэһилиэк дьоно-сэргэтэ улаханнык долгуйан, күндүргэтэн көрсүөхтэрэ. И.Гоголев «Наара Суох», Т.Сметанин «Лоокуут уонна Ньургуһун» диэн Саха тыйаатырын номох буолбут испэктээкиллэрин көрөөччүлэр көхтөөхтүк көрүөхтэрэ.

Олунньу 21 күнүгэр СӨ үтүөлээх артыыһа Дмитрий Михайлов салайааччылаах биригээдэ Амма туһаайыытынан айаннаата. Гастроллуур бөлөх Амма улууһун Эмис, Чакыр, Бөтүҥ, Сулҕаччы, Соморсун, Мээндиги, Абаҕа, Өнньүөс, Болугур, Алтан, Сатаҕай нэһилиэктэригэр, Мэҥэ Хаҥалас улууһун Бүтэйдээх, Өлөчөй, Суола, Табаҕа нэһилиэктэригэр сылдьан Н.Неустроев «Тиэтэйбит» диэн бэртээхэй кэмиэдьийэтин, Л.Васильева «Хаһан да» диэн долгутуулаах испэктээкилин көрдөрөн, дьону-сэргэни сэргэхситиэхтэрэ. Амма Бүлүү улууһунааҕар чугас эрээри, сорох нэһилиэктэргэ улахан автобуска аналлаах гаражтара суоҕа гастроллааччыларга мэһэйдэри үөскэтэр. Ол да буоллар, быйыл халлаан арыый сылаас буолан, бөлөх артыыстара көлөнү таһырдьа хоннорор ньымаларын толкуйдаан барбыттара.

Оттон Петр Макаров салайааччылаах үһүс бөлөх олунньу 24 күнүгэр ыраах хоту, Булуҥ улууһугар «Полярные авиалинии» компания самолетунан көтүөҕэ. Эдэр артыыстартан бөлөхтөрө Тиксиигэ, Быковка, Таймылырга, Хара Уулаахха, Күһүргэ, Бороҕоҥҥо түөрт испэктээкили көрдөрүөхтэрэ. Ол курдук, хоту дойду хоһуун олохтоохторо Н.Лугинов «Кустук», «Алампа «Олох дьэбэрэтэ» диэн дьоһуннаах испэктээкиллэрин сэргэ А.Чехов «Үбүлүөй», «Кэргэн кэпсэтии» диэн тэттик оонньууларын көрүөхтэрэ. Саха тыйаатыра Булуҥ улууһугар сылдьыбатаҕа түөрт уонча сыл буолбут. Онон улуус олоҕор быйылгы гастроллар умнуллубат, хатыламмат түгэннэринэн буолуохтара. Манна даҕатан эттэххэ, Булуҥтан төрүттээх саха тыйаатырын биллэр артыыската Ильяна Павлова дойдутугар уон сэттэ сыл буолан баран тиийэн дьонун-сэргэтин үөрдэрэ долгутуулаах, кэтэһиилээх буолара саарбахтаммат. Бороҕон, Быков курдук ыраах сирдэргэ артыыстары «Полярные авиалинии» вертолеттара тиэрдиэхтэрэ. Булуҥ курдук ыраах, муус-хаар үллүктээх, силлиэ тыаллаах дойдуга гастроллар ситиһиилэрэ айылҕа барахсантан улахан тутулуктаах. Онон эдэр артыыстарбыт сырыыларын күн-дьыл туран биэрэн атахтаабатар ханнык.

Гастроллар кулун тутар 23 күнүгэр түмүктэниэхтэрэ. Артыыстар Дьокуускайга кэлэн «Хаарыан хампа» өрөспүүбүлүкэтээҕи IX-с театральнай фестивальга кыттыахтара, кулун тутар 27 күнүн – Тыйаатыр аан дойдутааҕы күнүн бары тыйаатырдардыын, фестиваль ыалдьыттарынаан бииргэ бэлиэтиэхтэрэ.

0
0

Хоруй суох

Хоруйдаа