Былатыан Ойуунускай аатынан Саха тыйаатыра 114-с дьылын арыйар. Алтынньы ый 3-с күнүттэн 11-с күнүгэр диэри Алдан уонна Нерюнгри куораттарыгар гостуруолга барыаҕа.
Быйыл Арассыыйаҕа тыйаатыр сыла биллэриллибитинэн, Саха тыйаатыра Саха сирин промышленнай оройуоннарын киин куораттарыгар — Алдаҥҥа уонна Нерюнгрига — гостуруолга бараары бэлэмнэнэр.
— Алдан уонна Нерюнгри куораттарга үс испэктээк барыаҕа – тыйаатырбытын аан дойду таһымыгар таһаарбыт “Хаарыан хампа күөх кытылым”, режиссер Андрей Борисов туруоруута. Промышленнай улуустарбытыгар барарбыт быһыытынан, нуучча классиката хайаан да гостуруолбут репертуарыгар баар буолуохтаах диэн туран, Николай Гоголь “Ревизор” кэмиэдьийэтин илдьэ барабыт, 2015 сыллаахха Горнай Алтайтан кэлэн режиссер Эмма Иришева туруорбута. Үһүс испэктээкпит – сахалыы куттаах айымньыбыт – Ойуунускай “Кээрэкээн Ойууна”, Саха тыйаатырын сүрүн режиссера Руслан Тараховскай туруоруута.
Бу гостуруол политическай да, духуобунай да суолталаах тэрээһин буолар диэн бэлиэтээн этэбит. Бу айаны икки өттүттэн өйөөһүн, үбүлээһин буолла. Ол курдук, Алдан куората уонна Алдан оройуона, Нерюнгри куората уонна Нерюнгри оройуона өйөөтүлэр. Гостуруол үрдүк таһымнаахтык барарын туһугар көхтөөхтүк үлэлии сылдьаллар. Бу гостуруол бырабыыталыстыба анал аахсыйата буолар. Онон Алдан, Нерюнгри улууһун олохтоохторо бу аахсыйаҕа кыттыахтара диэн эрэнэбит”, — диэн Саха тыйаатырын дириэктэрэ Анатолий Николаев тус санаатын эттэ.
Саха тыйаатыра Алдан куоракка Алданнааҕы Үүнэр көлүөнэ тыйаатырыгар алтынньы 4 күнүгэр күнүс 12 чаастан уонна киэһэ 6 чаастан Николай Гоголь “РЕВИЗОР” уонна алтынньы ый 5 күнүгэр киэһэ 6 чаастан “ХААРЫАН ХАМПА КҮӨХ КЫТЫЛЫМ” испэктээктэри көрдөрүөҕэ. Алтынньы ый 6 күнүгэр киэһэ 6 чаастан “КЭЭРЭКЭЭН ОЙУУН” испэктээҕи Алданнааҕы култуура киинигэр оонньуоҕа. Оттон Нерюнгри куоратыгар Нерюнгритааҕы Актер уонна куукула тыйаатырыгар алтынньы ый 8 күнүгэр киэһэ 6 чаастан – “ХААРЫАН ХАМПА КҮӨХ КЫТЫЛЫМ”, алтынньы ый 9 күнүгэр күнүс 2 уонна 6 чаастан – “РЕВИЗОР”, алтынньы ый 10 күнүгэр – “КЭЭРЭКЭЭН ОЙУУН” испэктээктэри оонньуохтара.
Ангелла Попова, http://www.edersaas.ru
