Испэктээкил премьерата 1997 сыллаахха ахсынньы 5 күнүгэр Москва куоракка Маяковскай аатынан театр сценатыгар буолбута.
1999 сыллаахха испэктээкил «Кыһыл көмүс мааска» бириэмийэтигэр түһэриллибитэ. Ол сыл туруорааччы режиссер Андрей Борисов, худуоһунньук Геннадий Сотников, Илиир хоруолу оонньообут Ефим Степанов, Көрдөөх Көкөтү оонньообут Иннокентий Луковцев Россия государственнай бириэмийэтин лауреаттарынан буолбуттара. Биллиилээх кириитик Анна Степанова бу испэктээкили «Россия национальностарын театрдарын өрө күүрүүтүн, тиллиитин (ренессанс) муҥутуур чыпчаала» диэн сыаналаабыта.
Ол ааспыт сүүрбэччэ сыл кэннэ Андрей Саввич испэктээкили саҥардан, саҥалыы тыыннаан, чөлүгэр түһэрдэ. Урукку оонньообут артыыстартан Ефим Степанов эрэ бэйэтин урукку оруолун – Илиир хоруолу — оонньуоҕа, уоннааҕылар бары атын оруолларга киириэхтэрэ, эдэр артыыстар кыттыахтара.
Ол курдук урут оонньообут Иннокентий Дакаяров, Айаал Аммосов, Дмитрий Михайлов, Иннокентий Луковцев атын оруоллары оонньуохтара. Эдэр артыыстар Василий Борисов, Александр Борисов, Игорь Говоров, Валентин Макаров, Вячеслав Лавернов, Ильяна Павлова, Жанна Ксенофонтова, Айта Лавернова улахан оруолларга холонуохтара. Оттон аатырбыт-суолурбут Көрдөөх Көкөтү Игорь Говоров оонньуоҕа.
Саха көрөөччүлэригэр, театры таптааччыларга уруккуну-хойуккуну тэҥнээн көрөн дуоһуйалларыгар, астыналларыгар, ааспыты ахтан-санаан иэйии ухханыгар оҕустарар тоҕоостоох түгэн көһүннэ! Кэлиҥ, көрүҥ, дуоһуйа сынньаныҥ!
Испэктээкил киэһэ 5 чаастан саҕаланар.
