СӨ Бырабыыталыстыбатын бэрэссэдээтэлин солбуйааччыта Денис Белозеров уонна СӨ тыатын хаһаайыстыбатын миниистирэ Александр Атласов Калужкай уобаласка сырыттылар.
Калужскай уобалас тыа хаһаайыстыбатыгар бастыҥ көрдөрүүлээҕинэн уонна сайдыылааҕынан биллэр. Оттон Калуга куоракка отучча сылын үлэлиир «АгроТек» хампаанньа бүтүн Россия үрдүнэн инники күөҥҥэ сылдьар.
«АгроТек» ХЭТ салайааччыта Александр Хаимский ыалдьыттарга эт-үүт аһылык араас көрүҥүн оҥорон таһаарар оборудованиеларын көрдөрдө уонна туох-хайдах үлэлии-хамныы сылдьалларын билиһиннэрдэ.
Саха сирин делегацията маны сэргэ 3800 төбөлөөх (2500 ыанар ынахтаах) «Заря» племенной хаһаайыстыбаҕа сырытта. Манна биир ыанньыктан 7,5-9 тыһ. киилэ үүтү ыан туттараллар. Киһи сэҥээриэх, фермалар үксэ киһи үлэтин солбуйар кыахтаах автоматынан үлэлииллэр (роботизированнайдар).
Салгыы дэлэгээссийэ «РемпутьмашАгро» уонна бааһынай хаһаайыстыбалары көрүө-истиэ, үлэ хаамыытын билсэллэр.
