Бу күннэргэ өрөспүүбүлүкэ киин куоратыгар сааһырбыт дьон кыһалҕаларын быһаарыы, кинилэр иллэҥ кэмнэрин туһалаахтык атаарыыларыгар туһуламмыт Норуоттар икки ардыларынааҕы кэпмпириэнсийэ буолан ааста.
Онно араас дойдулартан учуонайдар, эмчиттэр, уопсастыбаннай деятеллэр кэлэн кыттыыны ыллылар. Бу дириҥ ис хоһоонноох тэрээһин чэрчитинэн Вьетнам дьахталларын Киин кэмитиэтин иһинэн үлэлиир Дьахтар академиятын филиалын преподавателэ, хотун Ле Тхи Тхань Там уонна кини кэргэнэ Вьетнам Республикатын «Вестар» компаниятын тас сыһыаннаһыыларга салайааччыта, быраап эйгэтигэр философия доктора, Етле Чунг Киен Өрөспүүбүлүкэ дьахталларын Сойууһун бэрэссэдээтэлэ Анжелика Андрееваны кытта көрүстүлэр. Анжелика Егоровна ыалдьыттарыгар саха дьахталларын уосастыбаннай олохторун сиһилии сырдатта. Оттон хотун Ле Тхи Тхань Там Вьетнам дьахталларын көрсөр кыһалҕаларын кэпсээбитэ, көрсүһүү кыттыылаахтарын олуһун долгутта.
«1975 сыллаахха АХШ ыыппыт кырыктаах сэриилэрэ Вьетнам дьахталларын холоруктуу ытыйан ааспыта. Сэрии ыар содулларын, баастарын дьахталлар барахсаттар билигин да оһоруна, аһарына сатыыллар. Ол курдук, американецтар эйэлээх олохтоох сэлиэнньэлэри буомбалыылларыгар туох эрэ биллибэт дьааты туттубуттар. Ол дьаат сүлүһүнэ сыалай провинциялары имири эһэн ааспыт. Билигин да Вьетнам дьахталлар төрүөҕүттэн илиитэ уонна атаҕа суох оҕолору төрөтөллөрө баар суол. Онон доруобуйа харыстабылын боппуруоһа Вьетнамҥа биир сытыытык турар боппуруоһунан буолар«, — диэн бэлиэтээтэ Ле Тхи Тхань Там.
Өссө биир сүрүн сүрүн кыһалҕа — үөрэхтээһин эйгэтэ. Ол курдук, Вьетнамҥа дьахталлар 50% үөрэхтэрэ суох эбит. Ол төрүөтүнэн оҕо саадыттан саҕалаан, оскуола уонна орто анал, үрдүк үөрэх төлөбүрдээхтэр.
Вьетнам дьахталларын салайааччыларыттан биирдэстэрэ хотун Ле Тхи Тхань Там учуонай кэргэнинээн Дьокуускай куораттааҕы «Сааһырбыт дьон Үһүс оскуолаларыгар» сылдьан, саастаах дьоҥҥо аналлаах сынньалаҥ киинин үлэтин-хамнаһын кытта билсэн, оҕолор реабилитационнай кииннэригэр сылдьан үлэ уопутун атастаста.
Вьетнам уонна Саха сирин республикаларын дьахталлара бииргэ түмсэн бииргэ үлэлээһин тосхоллорун торумнаатылар. Ол курдук, Саха сирин дьахталларыттан таҥыллыбыт састаап быйылгы сылга Вьетнам дьахталларын Ханойга тиийэн көрсүөҕэ.
