Саха сирин уонна Казахстан суруйааччыларын союзтара бииргэ үлэлээһиҥҥэ меморандумҥа илии баттастылар. Маннык үгэс уруккуттан баара. Бу туһунан Саха сирин суруйааччыларын союһун бэрэссэдээтэлэ Наталья Харлампьева кэпсээтэ. Кини Нур-Султан куоракка Азия дойдуларын суруйааччыларын бастакы Форумнарыгар кыттыыны ылла, диэн айар союз пресс-сулууспата иһитиннэрдэ.
Нур-Султан куоракка ыытыллыбыт айар дьон тэрээһиннэригэр барыта 90 суруйааччы 40 Азия дойдутуттан кыттыыны ылла. Кинилэр ортолоругар Нобелевскай бириэмийэ номинаннара бааллар.
Форум арыллыытыгар Казахстан президенэ Касым-Жомарт Токаев эҕэрдэлээтэ уонна «Улахан Азия» диэн норуоттар икки ардыларынааҕы бириэмийэни олохтуур уонна маннык киэҥ ыҥырыылаах мунньаҕы ситимин быспакка дойдуларынан көһөрө сылдьан ыытарга этиилэри киллэрдэ.
«Хас биирдии айар киһиэхэ бэйэтин коллегаларын кытта тэҥҥэ айар эйгэ, суруйааччы уонна былаас, кыһалҕалар тустарынан кэпсэтэр кэмэ кэлэр. Мин Казахстан суруйааччыларын союһугар миигин ыҥырбыттарыгар махтанабын. Бэрт соторутааҕыта союһу мин көлүөнэм киһитэ салайан саҕалаата. Мин кинини кытта 1979 сыллаахха VII Бүтүн союзтааҕы эдэр суруйааччылар мунньахтарыгар Москва куоракка кыттан турабын. Улугбек Есдаулетов — Казахстан Республикатын государственнай бириэмийэтин лауреата. Кини Саха сиригэр сылдьыбыта. «Дьулуруйар Ньургун Боотур» олоҥхону казахтыы тылга тылбааһы саҕалаабыта. Сэбиэскэй Союз урусхалламмытын кэннэ, бэйэ-бэйэбитин өр сылларга сүтэрсибиппит. Бу Форумҥа бииргэ үлэлээһиҥҥэ меморандумҥа илии баттастыбыт. Онон биһиги аксакалларбыт үгэстэрин сөргүттүбүт. Урут Саха сирин уонна Казахстан союзтара олус чугастык алтыһан үлэлээбиттэрэ. Күннэр ыытыллаллара, альманахтар уонна антологиялар таһаарыллаллара. Маны салгыахха наада», — диэтэ Наталья Харлампьева.
