29 Кулун тутар 29.03
  • -13°
  • $ 92,26
  • 99,71

Саха сирин туһунан саҥа мульт-киинэ баар буолла

Читайте нас на
Яндекс Новости
ЯДВ

Норуоттар икки ардыларынааҕы VI киинэ бэстибээлин оҕолорго аналлаах бырагырааматын чэрчитинэн кулун тутар 14 -17 күннэригэр Дьокуускайга SMART Бибилэтиэкэ 2.0.3. аудиториятыгар Оҕо анимационнай мастарыскыайа үлэлээтэ.


Бу — “Да” анимационнай устуудьуйа (Санкт-Петербург к.) социальнай бырайыага буолар. Анимационнай устуудьуйа туһунан уопсайынан этэр буоллахха, манна оҕолору да, улахан дьону да кытта дьарыктаналлар. Олох уустук түгэннэригэр түбэспит дьоҥҥо өйөбүл,  сүбэ-ама буолаллар.

Устуудьуйа 2008 сыллаахха Санкт-Петербурга аһыллыбыта, уопсайа 200-тэн тахса мульти-киинэлэри оҥордо. Айымньыларынан Арассыыйаҕа да, омук дойдуларыгар да араас бэстибээллэр кыттыылаахтара.

VI  норуоттар икки ардыларынааҕы киинэ бэстибээлигэр (коронавируһунан сибээстээн суһал дьаһаллар ылыллыахтарын иннинэ-аапт. бэлиэтээһинэ) Саха сиригэр бастакынан кэлбит бу айар бөлөх — “Да” анимационнай устуудьуйа педагогтара оҕолору кытта дьиҥнээх мультипликционнай киинэни оҥордулар. Эрдэттэн биллэриллибит куонкуруска электроннай почтаҕа 30-тан тахса сайаапка киирбититтэн, уруһуйдарынан, идиэйэлэринэн сүүмэрдээн, 10 оҕону талан ылбыттар.

— Бу – көннөрү, араас оскуолаларга үөрэнэр 8-11 саастаах оҕолор. Анаан-минээн уруһуйдьут оҕолор да буолбатахтар. Сүрүннээн идиэйэлэр куонкурустара этэ. Бэртээхэй хамаанда буоллубут – бары бииргэ сүбэнэн үлэлиибит. Оҕолору кытта уопсай тылы тута буллубут. Кинилэр хас биирдиилэрэ төрөөбүт дойдуларын — Саха сирин үгэстэрин, мифологиятын туһунан олус  нтэриэһинэйи үөрэ-көтө кэпсииргэ бэлэмнэр. Мультипликационнай киинэбитигэр бу хотугу өрөспүүбүлүкэни – Саха сирин туох биир тыынныырын, бииргэ түмэрин көрдөрөргө дьулуһабыт. Онуоха оҕолорбут көмөлөһөллөр, биһигини, манна аан бастаан кэлбит дьону, саха эйгэтигэр сирдээн, сибээстээн, киллэрэн биэрэллэр. Бары бииргэ оҥорор саҥа мультипликационнай киинэбит аатын эрдэттэн эппэппит – сэкириэт, — диир “Да” устуудьуйа анимацияҕа педагог-режиссера Полина Чернявская.

Оттон оҕолор айар үлэнэн үлүһүйбүттэрэ тута харахха быраҕыллар. Холобур, мин көрөн турдахпына, Уйгууна диэн кыысчаан сөптөөх кыраасканы булан, үрүҥ баатымаҥҥа саха сылгытын өҥүн түһэрдэ. Соня хаары уруһуйдуур. Полина хаарга киһи суолун ойуулуур. Оттон Саня кумааҕыны кырыйан, килиэйдээн, уруһуйдаан, Тимир ууһун бэлэмнээбитин көрдөрөр…

Ону хамаанда чилиэннэрэ — Антон, Гена, Саша камераҕа усталлар. Ити курдук, персонажтары уруһуйдаан, хас каадыр аайы хамсатан-имсэтэн биэрэн, бары бииргэ анимационнай киинэни оҥорон таһаараллар эбит…

Онон, бу күннэргэ саҥа, сонун айымньыны көрүөхпүт дии саныы сырыттахпытына, коронавируһунан быһыы-майгы уларыйан, бэстибээл сабыылаах эрэсиимҥэ көстө. Хата, айар бөлөх эрдэ-сылла таһаарыылаахтык үлэлээн, киинэтин устан бүтэрбитин туһунан бэҕэһээ пресс-кэмпириэнсийэҕэ иһиттибит.

Онон, оҕолорбут кыттыылаах оҥоһуллубут Саха сирин туһунан саҥа мульт-киинэни, табыгастаах түгэн тосхойдоҕуна, көрүөхпүт турдаҕа.

© edersaas.ru сайтан: http://edersaas.ru/myltkiine/

Следите за самым важным и интересным в Telegram-канале и WhatsApp-группе ЯСИА