Россияҕа «БКЭ-ни төрөппүттэр туттараллар» диэн акция олунньу 3 күнүгэр саҕаламмыта. Үөрэҕириигэ уонна наукаҕа кэтээн көрүү федеральнайдааҕы сулууспа көҕүлүүр. Дьаһал оскуоланы бүтэрээччилэргэ уонна кинилэр төрөппүттэригэр көмөлөһөр сыаллаах ыытыллар.
Оскуоланы бүтэрээччилэр БКЭ-ни туттарыыларыгар билии эрэ буолбакка өй-санаа өттүнэн бэлэм буолуу эмиэ улахан оруоллаах. Манна оҕоҕо дьиэ кэргэнэ улахан оруоллаах. Россия үрдүнэн ыытыллар акция төрөппүттэр БКЭ-ни бэйэлэригэр холонон, оҕолоругар эксээмэннэрин этэҥҥэ туттаралларыгар көмө буолалларыгар туһуланар.
«БКЭ-ни төрөппүттэр туттараллар» дьаһал төрдүс сылын ыытыллар. Саха сирэ куруук көхтөөхтүк кыттар. Холобур, 2019 сылга нуучча тылын эксээмэнин өрөспүүбүлүкэҕэ икки тыһыынчаттан тахса киһи суруйбута. Регион үөрэххэ уона наукаҕа миниистирэ Владимир Егоров сылын аайы кыттар.
2020 сыл Өйдөбүнньүк уонна Албан аат сылынан биллэрилибитинэн, быйыл төрөппүттэр историяҕа эксээмэн туттарыахтара.
