28 Кулун тутар 28.03
  • -11°
  • $ 92,59
  • 100,27

Саха сирин судаараарыстыбаннай филармонията туспа дьиэтэ суоҕун Ил Дархаҥҥа этиннилэр

14:51, 17 марта 2016
Текст:
Читайте нас на
Яндекс Новости
ЯДВ

Саха сирин судаарыстыбаннай филармонията дьиэтэ-уота, кэнсиэртиир саалата суох буолан олус эрэйдэнэр. Ону сэргэ музыкальнай инструменнара эргэрэн, исписэлиистэр тиийбэт буоланнар, кыһалҕа үрдүгэр олорор. Егор Борисов кэлэктиип санаатын истэн баран: «Үлэни-хамнаһы бүгүҥҥү эрэ күнүнэн буолбакка, киэҥник көрөр эбиккит. Сөптөөх сыалы-соругу тутуһан үлэлии-хамсыы сылдьаҕыт», — диэтэ. Итиэннэ ыам ыйыгар диэри симфоническай оркестр салгыы сайдыытын туһунан Ил Дархан Ыйааҕын бэлэмнииргэ эттэ. 


Кулун тутар 16 күнүгэр СӨ Ил Дархан Егор Борисов филармония кэлэктиибин кытта көрсөн баар кыһалҕалары иһиттэ. Филармония сайдыытын көрөр отдел салайааччыта Андрей Дедюкин: “Ырыынак үйэтигэр олорорбутунан музыканы эмиэ табаар курдук таһаарар буоллубут. Ити табаарбытын өссө үчүгэй оҥоруохпутун бэйэбит саалабыт суох буолан үлэбитин былаанныырбытыгар кыһалҕаны көрсөбүт”, — диэн иһитиннэрэр. Кырдьык, филармония билигин Оҕо искусствотын оскуолатын кытта ыаллаһан олорор буолан, олус кыараҕас уонна кэнсиэртиир сааланы куортамнаһалларыгар үтүмэн үптэрин куталлар.

Филармония салалтата бырабыыталыстыбаны кытта бу кыһалҕаны быһарыыга ыкса үлэлэһэр. Дьокуускай куорат салалтатын кытта кэпсэтэн, Оҕо искусствотын дьиэтин судаарыстыба уонна чааһынайдар бииргэ үлэлээһиннэрин ньыматын туһанан 2019 с. 203 оройуоҥҥа саҥалыы тутар былааннаахтар. Оччотугар Ярославскай уулуссатыгар турар дьиэ босхолонуохтаах.

Ол эрээри тутуу министиэристибэтэ этэринэн, бу дьиэни өрөмүөннүүргэ ортотунан 600-тэн тахса мөл. солк. наада эбит. «Филармония дьиэтин уларытыыга икки барыйаан баар. Бу олорор дьиэлэрин өрөмүөннээһин эбэтэр саҥа дьиэни тутуу. Бырайыакка билигин 800 тыһ. солк. көрдүбүт. Бастаан бу дьиэни реконструкциялыырга, акустикатын бэрэбиэркэлииргэ чинчийии үлэ ыытыллыан наада. Ол эрэ кэнниттэн быһаарыллыаҕа«, — диэн этэр миниистири солбуйааччы Павел Аргунов.

Ыспыраапка:

Саха сирин судаарыстыбаннай филармонията 2011 с. Егор Борисов ыйааҕынан тэриллибитэ. Тэрилтэ РСФСР үтүөлээх артыыһа, искусство үтүөлээх деятелэ, Саха сирин норуодунай артыыһа, СӨ Бочуотунай олохтооҕо, дирижер, педагог Галина Кривошапко аатын сүгэр. Галина Михайловна өрөспүүбүлүкэҕэ классическай музыка сайдыытыгар улахан өҥөлөөх. Саха сирин олохтоохторо Чайковскай аатырбыт “Лебединое озеро” балетын аан бастаан көрүүлэрэ, “Дьулуруйар Ньургун Боотур” олоҥхону аан бастаан грамзапиһынан истиилэрэ, классическай музыканы таптааччылар кулууптарын тэрийии барыта кини аатын кытта быстыспат ситимнээхтэр.

Билигин филармонияҕа кэнсиэр судаарыстыбаннай оркестрын таһынан “Symphonica ARTica” симфоническай, “Lena River Brass” духовой оркестрдар, “Sakha Brass” квинтет, “Arco ARTica” струннай, “Camerata Yakutsk” камернай, “БалАНС” балалайка ансаамбыллара үлэлииллэр.

Следите за самым важным и интересным в Telegram-канале и WhatsApp-группе ЯСИА