«Азия оҕолоро» норуоттар икки ардыларынааҕы VI-с спортивнай оонньууларга кыттар Саха сирин сүүмэрдэммит икки хамаандата Егор Борисовы кытта көрсүһүүгэ бириистээх миэстэлэр иһин киирсэргэ бэлэмнэрин эттилэр.
«Спорт хас биирдии көрүҥнэригэр мэтээли, бириистээх миэстэни ылар иһин кыаллары барытын оҥоруохпут, чиэһинэйдик киирсиэхпит. Оҕолор уонна тренердэр састааптарын аатыттан маннык үрдүк таһымнаах күрэхтэһиини тэрийэргит иһин улаханнык махтанабыт», — диэн Саха сирин сүүмэрдэммит хамаандатын аатыттан кылаабынай тренер Гаврил Сивцев эттэ.
Өрөспүүбүлүкэ баһылыга Егор Борисов спорт сайдарын туһугар элбэх оҥоһуллубутун, маныаха анаммыт элбэх эбийиэк тутуллубутун чиҥэтэн эттэ. «Сүүмэрдэммит хамаанда хайдах бэлэмнэммитин туһунан истэ-билэ сылдьыбытым. Ыалдьыттар эмиэ улахан бэлэмнээх кэллилэр», — диэтэ Ил Дархан.
Кини 20 сыл аннараа өттүгэр бастакы Оонньуулар хайдах ааспыттарын, онно аҕыс дойдуттан барыта 250 спортсмен кыттыбытын, оттон быйыл күрэхтэһии Россияны аахсыбатахха, 38 дойдуттан 4 тыһыынча спортсмены түмэ тардыбытын эттэ.
«Кэлиҥҥи сылларга Оонньуу аата-суола биллэ үрдээтэ. Норуоттар икки ардыларынааҕы спорт тэрилтэлэрин болҕомтото эмиэ күүһүрдэ. Кыттар дойдулар кыайыыга дьаныардаахтык туруулаһаллар санаалаахтар, онон, спорт 22 көрүҥэр күрэстэһэргэ бэлэм буолуҥ!», — диэн кини эбэн эттэ.
Көрсүһүү, хаартыскаҕа түһүү кэнниттэн Егор Борисов суруналыыстары кытта буолаары турар оонньуулар тустарынан санаатын үллэһиннэ.
