Үөрэх дьылын эрдэ түмүктүүр уонна оҕолор каникул кэмигэр тахсыылара сыстыганнаах дьаҥ тарҕаныытыгар төрүөт буолуон сөп. Ол туһунан миниистир Владимир Егоров эттэ диэн, СИА суруйар.
Дойдуга эпидемиологическай балаһыанньанан оскуолалар дистанционнай үөрэххэ көспүттэрэ. Бу сорохторго олус ыараханнык бэриллэр. Онон уопсастыба үөрэх дьылын эрдэ бүтэрэр туһунан киэҥник ырытар.
Үөрэх миниистирэ Владимир Егоров социальнай ситимнэринэн быһа эфиргэ маннык диэтэ: «Кыра кылаастарга уонна оскуоланы бүтэрээччилэргэ быһаарыыны туспа көрүөххэ наада. Салгыы үөрэххэ туттарсааччыларга олус эппиэтинэстээх. Үөрэх бырагырааматын толору билиэхтэрин наада. Атын кылаас оҕолоругар сымнатыыны киллэриэххэ сөп«.
Ити эрээри миниистир үөрэх дьылын былааннаммытыттан эрдэ тохтотор сыыһатын бэлиэтээтэ. «Чуолаан билигин дьаҥ тарҕаныыта ордук сытыырхайан турар кэмэ, онон туох баар ылыллар миэрэни толоруохтаахпыт. Оҕолору каникулга ыыттахпытына, биһиги кинилэри дьиэҕэ сатаан туппаппыт«, — диэтэ кини.
Начаалынайдары эрдэ ыытыахха сөп, бэлиэтээтэ миниистир, кинилэргэ ноҕурууска кыра. Оройуоттар бэйэлэрэ быһаарыы ылыахтарын сөп. Ити эрээри өрөспүүбүлүкэ туһааннаах министиэристибэтин кытта сөбүлэһиннэриэхтээхтэр.
