Көҥүл тустууну сөбүлээччилэр өрөспүүбүлүкэ сүүмэрдэммит хамаандатын хапытаанын Виктор Лебедевы өйүүр санаалаахтар. Кинилэр бүгүн киэһэ 8 чааска Хомсомуол болуоссатыгар миитиҥҥэ тахсыахтара.
Санатар эбит буоллахха, Виктор Лебедев Россия чемпионатын кэмигэр буолбут түгэн кэнниттэн, Рио-де-Жанейроҕа буолар Олимпийскай оонньууларга кыттар иһин путевканы ылыыга киирсиитин тохтоторун туһунан биллэрбитэ. Саха сирин тустууга Россияҕа биир бастыҥ уопуттаах уонна титуллаах тустуугунан биллэр. Ити эрээри Олимпиада мэтээлэ суох.
«Биһиги эрдэттэн түмүктэри таһаарыа суохтаахпыт. Виктор путевка иһин киирсиитин салгыахтаах, суол ортотугар тохтоон хаалыа суохтаах. Саха норуотун туһугар, сүгүрүйээччилэрин туһүгар. Элбэх үлэ ыытылынна, күүс, кыах, үп-харчы баранна. Бачча элбэх үлэни биир түгэнинэн сотон кэбиһэр табыллыбат», — диэн миитини тэрийээччилэртэн биирдэстэрэ, суруналыыс Николай Бястинов этэр.
Тэрийээччилэр иһитиннэрэллэринэн, миитиҥҥэ көҥүл тустуу биллэр бэрэстэбиитэллэрэ кыттыахтара. Миитин кэмигэр Лебедевы өйүүр петицияҕа илии баттатыы ыытыллыа.
«40 сыл буолла саха норуота Олимпиада мэтээлин кэтэспитэ. Маннык тыҥааһыннаах кэмҥэ биһиги туора туран хаалыа суохтаахпыт, бэриниэ суохтаахпыт. Саха сирин сирэйэ көстөр кэмэ үүннэ. Чуолаан норуот киэн туттуутун өйүүр сыаллаах «Виктор, мы с тобой!» диэн акция тэриллэр. Барыгытын кыттыһаргытыгар ыҥырабыт!» — диэтэ Бястинов.
Бүгүн киэһэ, бэс ыйын 1 күнүгэр, киэһэ 8 чааска буолар миитини тэрийээччилэр көҥүл тустууну чахчы таптааччылар пааспаргытын, спортсмены өйүүр баннердаргытын илдьэ кэлэргитигэр ыҥыраллар.
