Атырдьах ыйын 1-5 күннэригэр Амма улууһугар VII Саха сирин норуоттарын спортивнай оонньуулара ыытыллыаҕа. Маныаха араас хайысханан 150 волонтер үлэлиэҕэ. Маны таһынан, устудьуон этэрээтин 90 байыаһа Амманы оонньууларга анаан бэлэмниэҕэ, тупсарыаҕа. Бу туһунан, СӨ Ыччат дьыалаларыгар уонна дьиэ кэргэн бэлиитикэтигэр министиэристибэтэ иһитиннэрэр. edersaas.ru
Муус устар 13 күнүгэр миниистир Иван Луцкан Саха сирин норуоттарын спортивнай оонньууларыгар волонтердары уонна байыастары кытта үлэлиир хамыыһыйатын бастакы мунньаҕа буолла. Манна Амма улууһун салалтата уонна физическэй култуураҕа, маассабай спорка управлениетын бэрэстэбиитэллэрэ кытыннылар. Мунньахха волонтердары, байыастары хайдах аһаталларын, таҥыннаралларын, тугу үлэлииллэрин торумнастылар, быһаарыстылар.
Бу сайыммыт саамай улахан тэрээһинигэр кыттар доброволецтар анаан үөрэхтээһини ааһыахтара, добровольческай хамсааһын төрүттэрин, оонньуулар устуоруйаларын билиэхтэрэ.
Оттон устудьуон этэрээтин байыастара араас тутуу, тупсарыы үлэлэрин ыытыахтара. edersaas.ru
1
0
