29 Кулун тутар 29.03
  • -13°
  • $ 92,26
  • 99,71

Саха сирин мадьынылара Виктор Колибабчугу кыайар соруктаахтар

15:44, 07 октября 2016
Текст:
Читайте нас на
Яндекс Новости
ЯДВ

Саха сирин мас тардыһааччылара Дмитрий Попов уонна Эрчим Баппаҕай аан дойду чөмпүйүөнүн Виктор Колибабчугу кыайар соруктаахтар. Ол туһунан кинилэр Арассыыйа чөмпүйэнээтин түмүгүнэн буолбут пресс-конференцияҕа эттилэр.


Мас-реслиҥҥэ күрэхтэһии алтынньы 2 күнүгэр Екатеринбург куоракка буолбута. Дойду муҥутуур кыайыылааҕа 150 кг ыйааһыннаах Виктор Колибабчук бэйэтин аатын бигэргэттэ. Финалга Саха сирин мадьыныта Дмитрий Попов киниэхэ хоттордо. Дмитрий биир үксүн 90 кг диэри ыйааһыҥҥа тардыһара. Эрчим Баппаҕай Колибабчукка кыайтаран боруонса мэтээли ылла.

«Викторы кытта мин финалга күөн көрсүбүтүм. Кини тиэхиньикэ өттүнэн баһыйтарар, миигин ыйааһынынан кыайбыта. Онон ыйааһыммын эбэргэ дьулуһабын. 125 кг буоллахпына, кинини кыайыам дии саныыбын», —диир Дмитрий Попов.

Дойду сүүмэрдэммит хамаандатын ыстаарсай тренерэ Николай Константинов кинини кытта сөпсөһөр. Кини Саха сирэ кыахтаах уонна улахан инникилээх мас тардыһааччылардааҕын бэлиэтиир. Кинилэр ортолоругар Дмитрий Попову, Эрчим Баппаҕайы уонна Томпо улууһуттан Сергей Фролкины ойуччу тутан ааттаата.

Виктор Колибабчук бу сылга иккитэ: АХШ «Арнольд Классик» турнирыгар уонна аан дойду чөмпүйэнээттэригэр хотторбута. АХШ-гар Мартинс Лицисаҕа, оттон иккис сырыытыгар грузин Звиад Каджаяҕа кыайтарбыта.

Дьахталлар ортолоругар дойду муҥутуур кыайыылааҕынан Мэҥэ Хаҥаластан Туйаара Орлова буолбута. Финалга Свердловскай уобаластан сылдьар Светлана Тихоноваттан маһы былдьаабыта.

«Мин аан бастакыбын муҥутуур кыайыылаах үрдүк аатын ыллым. Күрэхтэһиилэргэ икки күүстээх утарсааччыны көрүстүм. Кинилэр ыйааһыннара миигиттэн 50 тахса кг ыарахан. Бэйэбэр аан дойдуга кыайар соругу туруорунабын», —диэтэ Туйаара Орлова.

Саха сирин мадьынылара Голливуд артыыһа Арнольда Шварцнеггер турнирын чэрчитинэн ыытыллар аан дойду чөмпүйэнээтигэр киирсэ барыахтара.

Следите за самым важным и интересным в Telegram-канале и WhatsApp-группе ЯСИА