Саха сирин олохтоохторо идэлээх сойуустар федерацияларын бэрэссэдээтэлэ Николай Дегтяревка ыйытыыларын WhatsApp нөҥүө биэриэхтэрин сөп.
8914-286-00-36 батсаап-нүөмэргэ өрөспүүбүлүкэ олохтоохторо суруйан үлэ быраабыгар ыйытыыларыгар тута эппиэттэри ылыахтарын сөп.
Нэһилиэнньэ ыйытыытыгар эппиэти биэрии федерация үлэтин биир сүрүн соруга буолар. Саҥа ылыллыбыт сокуоннар, хамнас төлөбүрэ, социальнай-үлэ сыһыаннаһыылара — куруук баар ыйытыылар. Билигин коронавируһунан пандемия кэмигэр нэһилиэнньэни кытта сибээс ордук көдьүүстээх буолла.
«Ыйытыы элбэх буолара чуолкай. WhatsApp-линиянан ыйытыыга тута эппиэти биэрии судургутуйуо. Кэмитиэттэр эмиэ кыттыһыахтара, онон баар уустуктары дириҥэтэн үөрэтэн, эппиэт бэриллиэ. Ыйытыылары икки тылынан ылабыт — сахалыы уонна нууччалыы. Үлэ кэлэктииптэригэр тахсар уустук боппуруостар болҕомтоҕо ылыллан, үөрэтиллэн быһаарыллалларыгар төһүү күүс буолуоҕа», — диэн эттилэр федерация пресс-сулууспатыгар.
