Өрөспүүбүлүкэ былааһа регион хотугу эргимтэтигэр атыы-тырааныспар кииннэрин тутар туһунан бырайыак оҥорор. Маннык быһаарыы хотугу улуустар олохтоохторун оҕуруот аһынан уонна социальнай суолталаах табаарынан хааччыйыыга туһалыахтаах.


«Атыы-логистическай кииннэр уу суолунан тыа хаһаайыстыбатын бородууксуйатынан уонна социальнай суолталаах табаарынан Арктика зонатын хааччыйыы иэнин улаатыннарыыга кыаҕы үөскэтиэ», — диэтэ Ил Түмэн бырабыыталыстыбаннай чааһыгар вице-премьер Денис Белозеров.

Кини этэринэн, оҕуруот аһа, ол иһигэр хортуоппуй, анал ыскылааттарга өр кэмҥэ харалла сытан, кэмиттэн-кэмигэр хоту уонна Арктика улуустарынан тарҕаныаҕа.

«Маннык кииннэр факторий ситимэ үлэлииригэр олук буолуохтара. Анал кииннэри тутан, онно тиэллэр-таһыллар бородууктаны харайыахпыт. Маны сэргэ аптека пууннара баар буолуохтара. Итиэннэ промысловой бородууктаны, холобур, балыгы соҕотуопкалааһын хонтуората арыллыаҕа. Төннөр рейстэргэ бартердаһан ыытарга табыгастаах буолуоҕа», — диэн быһаарда СИА-ҕа тыа хаһаайыстыбатын миниистирин солбуйааччы Василий Афанасьев.

Билигин бырайыагы олоххо киллэрэргэ өрөспүүбүлүкэ Уһук Илини сайыннарыыга Фонданы кытта 750 мөл.солк. иэс ыларга кэпсэтии ыытар.

Агентствоҕа иһитиннэрбиттэринэн, иэһи төлөөһүн 20 сылга болдьохтоох, салгын уонна айан суолларын экономиятыттан киирбит харчынан сабыллыахтаах: «Биһиги уу суоллаах оройуоттарга 2021 сылтан 10 факторийы тутар былааннаахпыт». 

0
0
comments powered by HyperComments