Быйыл күүстээх ардахтар оттооһуну улаханнык мэһэйдээтилэр. Ордук хоту улуустарга маныаха тыҥааһыннаах быһыы-майгы үөскээбитэ биллэр. Тыа хаһаайыстыбатын миниистирин солбуйааччы Афанасий Семенов бу улуустар ото суох хаалбаттарын СИА-ҕа бигэргэттэ.
«Эбээн-Бытантаайга, Үөһээ Дьааҥыга, Өймөкөөҥҥө оттуур ходуһалар ууга былдьаннылар», — диир кини.
Ону таһынан Хаҥалас, Мэҥэ Хаҥалас, Нам улуустарыгар отуур сирдэр эмиэ ууга сыталлар. «Гидромет дааннайыгар олоҕурдахха, киин улуустарга уу сыыйа-баайа түһэн эрэр. Ардахтар тохтоотохторуна, от үлэтэ сөргүтүллүө», — диир Семенов.
Кини хоту улуустар ходуһалара төһө да ууга сытталлар, ото суох хаалбаттарын туһунан чиҥэтэн этэр. Киин, Илин Эҥэр улуустарыгар эмиэ саппаас фондатыттан оту биэриэхтэрэ. Наада буоллаҕына, сайаапканан үллэриэхтэрэ.
Ону таһынан бырабыыталыстыба Кэмпэндээйи тууһун, мобильнай биригээдэлэри тэрийэргэ үбү-харчыны биэрэн көмөлөһүөҕэ.
Афанасий Семенов этэринэн, окко бастыҥнары быһаарар куонкурус уруккутун курдук ыытыллыаҕа. Кыайыылаахтарга сыаналаах бириистэри күһүн «Ас-үөл-2016» дьарбаҥкаҕа туттарыахтара.
Быйыл өрөспүүбүлүкэ окко былаана 493 тыһ.тонна от, 13 тыһ.тонна сеннаж уонна 14 тыһ. тонна сиилэс. Улуустар тыа хаһаайыстыбатыгар управлениелара иһитиннэрбиттэринэн, миэстэтигэр 59 тыһ.тонна оту бэлэмнээбиттэр.
