Кировскай уобаласка буолбут хайыһарга дойду күрэхтэһиитигэр Саха сирин спортсмена Владимир Рыбкин иккис миэстэ буолла. Бу көрдөрүүтүнэн кини Германияҕа ыытыллыахтаах аан дойду таһымнаах киирсиигэ Россияны көмүскүөҕэ.
Олимпийскай эрэллэр хайыһарга спортивнай оскуолатын дириэктэрэ Михаил Чугунов иһитиннэрбитинэн, спринт-күрэхтэһии көҥүл истиилинэн барбыт. Владимир Рыбкин эрэллээхтик квалификациятын ылбыт, онтон финал чиэппэригэр уонна ортотугар кыайталаан испит. Түмүктүүр түһүмэххэ, буоларын курдук, бойобуойдук бэлэмнэммит. Финал устата күрэхтэһиини хонтуруоллуу испит уонна түмүктүүр чааһыгар Москва уобалаһыттан спортсмен Сергей Волковтыын тахсан кэлэр.
«Финишка диэри 50 м хаалыар диэри Рыбкин инникилээн испитэ, ити эрээри Волков «шпагатынан» Саха сирин спортсменын баһыйа тутар. Онон кыһыылаахтык иккис миэстэ буолла. Ити эрээри бастакы уонна иккис миэстэлэр аан дойду таһымыгар күрэххэ кыттарга көҥүлү биэрэр. Үсүһүнэн Удмуртияттан Владислав Афанасьев кэлэр. Владимир Рыбкин ситиһиитинэн кини тренерин Ирина Рыбкинаны эҕэрдэлиибит. Бу сезоҥҥа уол Юрий Каминскай салайыытынан эрчиллибитэ», — Михаил Чугунов кэпсээтэ.
