Саха сирин үгүс нэһилиэктэригэр биэлсэрдэр тиийбэттэр

0
50

Алтынньы 28 күнүгэр СӨ Судаарыстыбаннай Мунньаҕын (Ил Түмэн) доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга бастайааннай кэмитиэтин бэрэссэдээтэлэ Александр Корякин салайааччылаах «бырабыыталыстыбаннай чааска» «Тыа сирин биэлсэрэ» бырагыраама олоххо киириитин дьүүллэстилэр.


— Доруобуйа харыстабылыгар каадырдар тиийбэттэрэ уонна нэһилиэнньэ эмчиттэр үлэлэринэн астыммата элбээн иһиитэ босхо медицинскэй көмө табыгаһа уонна хаачыстыбата суох буолуутугар тириэртилэр. Бу көстүү чуолаан биэлсэр-акушер пууннара (ФАП) суох нэһилиэнньэлээх пууннарга билиннэ, – диэн СӨ доруобуйа харыстабылын министиирин бастакы солбуйааччы Олег Припузов иһитиннэрдэ.

Онтон хоту уонна Арктика улуустарыгар медицинскэй үлэһиттэринэн хааччыйыыга улахан туһаны «Тыа сирин биэлсэрэ» бырагырааманы олоххо киллэрии ылар. Бырагыраама быһыытынан хотугу уонна Арктика улуустарыгар үлэлии кэлбит 35-гэр диэри саастаах биэлсэрдэргэ уонна акушердарга 700 тыһыынча суумалаах биир кэмнээх харчы бэриллэр.

Олег Припузов «Тыа сирин биэлсэрэ» бырагырааманы өрөспүүбүлүкэ атын улуустарыгар тарҕатар кыаҕы үөрэтэргэ ыҥырда. Ону тэҥэ СӨ Доруобуйа харыстабылын министиэристибэтэ исписэлиистэри олохтуур уонна кинилэр төттөрү барбаттарын туһугар олохтоох бэйэни салайыныы уорганнара муниципальнай үбү туһаныы, социальнай өйөбүл уонна олорор дьиэнэн хааччыйыы боппуруостарын үөрэтэллэригэр ыҥырар. Дьокуускайдааҕы медицинскэй колледж дириэктэрэ Дмитрий Алексеев бэлиэтээбитинэн, сорох муниципальнай тэриллиилэр (Ленскэй, Мирнэй, Ньурба улуустара) орто сүһүөх каадырдары бэлэмнииргэ муниципальнай бюджеты туһанар буолан эрэллэр.

«Тыа сирин биэссэрэ» бырагырааманы өрөспүүбүлүкэ бары улуустарыгар тарҕатар кыах туһунан Олег Припузов этиитин Дмитрий Алексеев эмиэ өйөөтө. Ол эрээри, Ил Түмэн Хотугу сир аҕыйах ахсааннаах төрүт норуоттарын боппуруостарыгар уонна Арктика дьыалатыгар бастайааннай кэмитиэт бэрэссэдээтэлэ Елена Голомарева бу бырагыраама Арктика улуустарын кыһалҕаларын быһаарар туһугар ылыллыбытын санатта. Ол да үрдүнэн хотугу улуустар нэһилиэктэригэр биэлсэрдэр тиийбэттэр.

Норуодунай депутат Дмитрий Саввин Саха сирин сэлиэнньэлэригэр ФАП-ры тутуу боппуруоһун Александр Корякин, Александр Романов, Василия Местников уонна Дмитрий Саввин бэрэссэдээтэллэрдээх бастайааннай кэмитиэттэр холбоһуктаах мунньахтарыгар көрөргө этиитин парламентарийдар өйөөтүлэр.

ЫСПЫРААПКА:

Саха сиригэр 208 биэссэр-акушер пууна (ФАП) уонна биэссэр пууна (ФП) баар;

Онтон 31-рэ – Арктика уонна өрөспүүбүлүкэ хоту оройуонугар баар.

0
0
[the_ad_group id="742"]