Саха сирин бюджетын дохуота быйыл 6,8 млрд. солк. улааппыт

Бу сылга Саха сирин судаарыстыбаннай бюджетын дохуота 175,9 млрд солк. диэри тиийдэ. Былырыыҥҥыны кытта тэҥнээтэххэ, эбиллии 6,8 млрд.солк. тэҥнэһэр. Ити туһунан үп миниистирэ Валерий Жондоров бүгүн буолбут бырабыыталыстыба брифинигэр эттэ.


«Федеральнай бюджеттан бэриллэр субвенция, субсидия суотугар бу эбиллии төрүөттэнэр. Ити кээмэйэ быһа холуйан 6,145 млрд. солк., дьону эргэ дьиэлэртэн көһөрүүгэ анаан «РИК Плюс» тэрилтэттэн 2,1 млрд. солк. бэрилиннэ», —диир Валерий Жондоров.

Нолуок киириититтэн регион дохуота улааппыт. Ити 1,5 млрд.солк. тэҥнэспит.

Миниистир эппитинэн, бюджет ороскуота эмиэ улааппыт. Ол курдук үрдээһин 7,9 млрд.солк. быһыллар. Ороскуот уопсай кээмэйэ 185 миллиард. Итинтэн баһыйар үксэ нэһилиэнньэҕэ чэпчэтиилэри олохтооһун түмүгэр ДьКХ тэрилтэлэрэ сүтэрбит дохуоттарын толуйууга ыыппыттар.

«Биллэн турар, социальнай эйгэҕэ эбии ороскуот баар. Холобур, санавиацияҕа 49 мөл.солк., эминэн хааччыйыыга 213 мөл.солк., пенсияҕа регион эбиитэ 64 мөл.солк. буолла», — диэтэ Жондоров.

Судаарыстыба бырагыраамаларыгар быйыл быһа холуйан 1,5 млрд.солк. туһаныллыбыт.

This post was published on 10.10.2016 15:02 15:02