Бүгүн, балаҕан ыйын 27 күнүгэр, Саха сирин бырабыыталыстыбатын билиҥҥи састааба боломуочуйатын тохтотуоҕа. Миниистирдэр кэбиниэттэрин түмүктүүр мунньаҕа Айсен Николаев дуоһунаһыгар киириитин сиэрин-туомун кэнниттэн тута ыытыллыаҕа, диэн СИА иһитиннэрэр.
Санатан эттэххэ, Саха сирин Конституциятын 78 ыстатыйатын 3 чааһыгар олоҕуран, өрөспүүбүлүкэ бырабыыталыстыбата дуоһунаһыгар киирбит саҥа баһылык иннигэр боломуочуйатын тохтотор.
“СӨ Ил Дарханын Сокуонугар” олоҕуран, дуоһунаһыгар киирээт даҕаны Саха сирин Ил Дархана бырабыыталыстыба мунньаҕын ыытар, манна кини бырабыыталыстыба бэрэссэдээтэлин өрөспүүбүлүкэ социальнай-экономическай сайдыытын туһунан дакылаатын истэр. Бу мунньахха бырабыыталыстыба бэйэтин үлэтин тохтоторун туһунан быһаарыыны ылынар. Регион баһылыга астаапканы ылынан уонна туһааннаах ыйаахха илии баттаан баран, Миниистирдэр кэбиниэттэрин саҥа састаабыгар кимнээх кандидатураларын киллэрэри толкуйдуур уонна Судаарыстыбаннай Мунньах (Ил Түмэн) көрүүтүгэр премьер пуоһугар уонна тутаах министиэристибэлэргэ салайааччылар кандидатураларын киллэрэр.
This post was published on 28.09.2018 09:02 09:02