Саха сирин бастыҥ иитээччилэрин идэлээх бырааһынньыктарынан эҕэрдэлээтилэр уонна бырабыыталыстыба наҕараадаларын туттардылар. Өрөгөйдөөх тэрээһин бүгүн балаҕан ыйын 30 күнүгэр буолла, диэн СИА иһитиннэрэр.  


Саха Өрөспүүбүлүкэтин үөрэҕириигэ уонна наукаҕа миниистирэ Владимир Егоров эппитинэн, Саха сиригэр оскуолаҕа киириэн иннинээҕи саастаах оҕолору иитэр-үөрэтэр эйгэ сайдар уонна үрдүк таһымҥа турар.

«Биһиги оскуола иннинээҕи саастаах оҕолору үөрэтэр тэрилтэлэрбит үлэлэринэн чахчы киэн туттабыт. Быйыл Россияҕа бу эйгэҕэ бастыҥ практикалары көмүскээһиҥҥэ 15 кыайыылаах баар эбит буоллаҕына, алта лауреат Саха сириттэн кытынна. Москва куоракка ыытыллыбыт норуоттар икки ардыларынааҕы кэмпириэнсийэҕэ биһиги өрөспүүбүлүкэбит фокус-регион аатын ылла. Ол аата биһиги Россиятааҕы уонна тас дойдулардааҕы коллегаларбыт биһиги уопуппутун биһирээтилэр уонна бэйэлэрин үлэлэригэр киллэрэр баҕалаахтарын эттилэр», — диэтэ миниистир.

Егоров бырааһынньыгынан эҕэрдэлииригэр иитээччилэр Саха сирин кырачаан олохтоохторун сайдыыларын сүҥкэн кылааты киллэрэллэрин тоһоҕолоон бэлиэтээтэ: «Дьыссаакка оҕолорбут сайдаллар, дьоҕурдара арыллар. Иитээччилэр кырачааннар талааннара арылларыгар бары кыахтарын туһанан үлэлииллэр».

Наҕараада ылааччылар ортолоругар «Воспитатели России – 2019» VII Бүтүн Россиятааҕы куонкурус бастакы өрөспүүбүлүкэтээҕи түһүмэҕин кыайыылаахтара бааллар. Кинилэри сэргэ «Лучшие детские сады России — 2019» Бүтүн Россиятааҕы көрүү-күрэх кыайыылаахтара наҕараадаланнылар. 11 дьыссаат Россия 500 бастыҥнарын ортортугар киллэриллибитин бэлиэтиир тоҕоостоох.

Сигэн:

0
0

Хоруй суох