Российскай Федерацияҕа тыа хаһаайыстыбатын министиэристибэтэ бэйэтин саайтыгар үчүгэй балаһаны аста. Манна фермерство уонна кооперация бастыҥ бырайыактарын тустарынан кэпсииллэр. Соторутааҥҥыта манна Саха сирин табаары оҥорооччулара «Бырайыак бастыҥа» диэн аакка киирдилэр.
Уопсайа 32 регионтан 17 хайысханан ситиһиилээхтик үлэлиир 146 бырайыак манна баар.
Чурапчы Муҥудайын фермерэ Айсен Егоров туһунан манна кэпсэнэр.
Кини Дьокуускай куорат 7-с №-дээх оскуолатын үөрэнэн бүтэрбит. ДьТХА инженер-механик идэтин ылбыт. Дьиэ кэргэнин кытта тыа сиригэр көһөн тахсан 2013 сылтан ыла сүөһү иитэр.
Хаһаайыстыба 24 гектар сири арендаҕа ылбыт. «Чараҥ» агрокластерга киирэр. Кластерга эдэр исписэлиистэргэ анаан олорор дьиэ тутуллар. 2015 сыллаахха Айсен Егоров «Бастыҥ предприниматель» аакка грант ылбыт. Ити үбүгэр-харчытыгар 25 төбө сүөһүгэ анаммыт хотону, биир кэмнээх көмө харчыга 2 этээстээх олорор дьиэни туппут. Бэйэтин үбүгэр-харчытыгар кредиккэ киирэн МТЗ-82.1 тыраахтары уонна 25 төбө сүөһүнү атыыласпыт.
2016 сыл от ыйын 1 күнүнээҕи туругунан хаһаайыстыба 81 сүөһүлээх. Итинтэн 30 — ыанар ынах. Үүтү оҥоруу валовай көрдөрүүтэ 42 тонна, итинтэн 38 тонната «Чурапчы» СХПК нөҥүө атыыламмыт.
Кэбээйи улууһун фермерэ Аксинья Левина бырайыак иккис кыттыылааҕа. Кини «Ворошилов» бааһынай хаһаайыстыба салайаччыта, Арассыыйа үтүөлээх фермерэ, СӨ тыа хаһаайыстыбатын туйгуна.
Левина 1997 сыллаахха бааһынай хаһаайыстыбаны тэрийбит. 2014 сыллаахха дьиэ кэргэн ферматын тэрийиигэ анаммыт граны ылбыт. Ити үбүгэр-харчытыгар 100 төбө сүөһүгэ анаммыт хотону туппут. Манна 539 сүөһүлээх, онтон 179 ыанар ынах. 180 тонна үүтү оҥорон таһаарбыт. Үүтү атыыттан киирэрэ үбэ-харчыта 1 мөл. 292 тыһ. солк. Хаһаайыстыбаҕа 12 киһи үлэлиир.
«Томтор» потребительскэй кооператив нөҥүө эти, үүтү атыылыыр.
Бырайыактар тустарынан http://www.mcx.ru // http://ruraldevelopment.ru саайтка билсиэххэ сөп.
