Японияҕа сырыытын чэрчитинэн ахсынньы 5 күнүгэр Саха сирин баһылыга Айсен Николаев Япония экэниэмикэҕэ, бырамыысыланнаска уонна эргиэҥҥэ минииистирин, Япония экэниэмикэ эйгэтигэр Арассыыйаны кытта бииргэ үлэлээһиҥҥэ миниистирэ тойон Хиросигэ Сэкону кытта көрүстэ.
Тойон Сэко Саха сирин баһылыгын Япония дэлэгээссийэтэ Дьокуускайга бэс ыйыгар сырыытын кэмигэр истиҥник көрсүбүтүн иһин махтанна. Миниистир Сэко Үс Хатыҥҥа “Туймаада Ыһыаҕар” кытыыны ылбытын олус күндүтүк саныыр. Ону тэҥэ “Өлүөнэ очуостара” айылҕа пааркатыгар сырыытын астына ахтар.
Көрсүһүү кэмигэр Айсен Николаев уонна тойон Хиросигэ Сэко Саха сиригэр Япония инвестордара кыттыылаах бырайыактары, Дьокуускайга “Хоккайдо Корпорэйшн” Япония хампаанньата сылы эргиччи үлэлиир теплица комплексын бырайыагын үһүс түһүмэҕин олоххо киллэриини дьүүллэстилэр.
Өрүттэр Өлүөнэни туоратар муостаны тутуу технико-экэнэмиичэскэй торумун ыытыыга Япония хампаанньалара кыттыыларын боппуруоһун көрдүлэр. Тойон Сэко Япония хампаанньалара Саха сиригэр инвестиционнай бырайыактары олоххо киллэриигэ кыттыыларын тус бэйэтинэн хонтуруоллуурга эрэннэрдэ.
Ону тэҥэ ахсынньы 5 күнүгэр куорат хаһаайыстыбатын, бөх тобохторун, үрдүк технологиялар эйгэлэрин боппуруостарыгар стратегическай кэпсэтиилэр ыытылыннылар.
Ахсынньы 6 күнүгэр Айсен Николаев Япония баанын бэрэссэдээтэлэ Тадаси Маэданы кытта көрүстэ, онно Саха сиригэр инфраструктураҕа анаммыт бырайыактары бииргэ олоххо киллэрэр туһунан дьүүллэстилэр. Тойон Маэда Япония баана тыа хаһаайыстыбатын уонна цифровой сайдыы бырайыактарын өйүөҕэ диэн эрэннэрдэ.
edersaas.ru
This post was published on 07.12.2018 16:26 16:26