Саха сирин бүддьүөтүгэр бастакы кыбартаалга дохуот киириитэ куһаҕана да суоҕун иһин, регион экэниэмикэтин уратытынан былааннаммыт көрдөрүүлэр туолумуохтарын сөп. Маныаха бүддьүөт үлэһиттэрин хамнастарын үрдэтии уонна үлэ төлөбүрүн алын кээмэйин үрдэтии тумус тутуллар хайысхалар. Бу туһунан өрөспүүбүлүкэ үбүн миниистирэ Валерий Жондоров иһитиннэрдэ.
Регион бырабыыталыстыбата былаас федеральнай уорганнарын уонна нолуогу бөдөҥ төлөөччүлэри кытта былааннаах сорудахтары толорууга бииргэ үлэлиир.
2018 сылга судаарыстыбаннай бүддьүөт дохуота 188,6 млрд солкуобайга тэҥнэһэр, ол иһигэр нолуок уонна нолуоктан киирбэт дохуоттар -117,6 млрд. Тохсунньу-кулун тутар ыйдарга 41,4 млрд солкуобай киирдэ.
Бүддьүөт ороскуота 2018 сылга 190,3 млрд солкуобайынан быһылынна. Бүддьүөт дефицитэ 1,7 млрд солкуобайга тэҥнэһэр.
Бырабыыталыстыба буолаары турар мунньаҕар Үп министиэристибэтэ бүддьүөтү чопчулааһын бырайыагын киллэриэҕэ. Жондоров этэринэн, дохуот уонна ороскуот параметрдара 4,2 млрд солкуобайынан улаатыаҕа. Чуолаан, тус сыаллаах үп хамнас алын кээмэйин үрдэтиигэ, биэнсийэҕэ регионнааҕы эбии төлөбүргэ, үс саастарын туола илик оҕолорго оскуола иннинээҕи оҕо тэрилтэлэригэр эбии миэстэлэри тэрийиигэ ыытыллыаҕа.
Руслан Басыгысов
Мария Васильева түһэриитэ
