Бүгүн-сарсын Краснодарга тыа хаһаайыстыбатын оҥорон таһаарааччыларын Бүтүн Россиятааҕы форума ыытыллар. Онно Саха Өрөспүүбүлүкэтин аатыттан 6 киһилээх дэлэгээссийэ кытта барда. Дэлэгээссийэни тыа хаһаайыстыбатын уонна ас-үөл бэлиитикэтин миниистирин солбуйааччы Николай Петров салайан илдьэ сылдьар.
Саха аграрийдарын хамаандатыгар “Өлүөхүмэ кыладабыайа” ХЭУо генеральнай дириэктэрэ Николай Ефимов-Владимиров, Амматтан эдэр фермер Александр Фомин, Сунтаартан “Кириэстээх” ТХПК бырабылыанньатын бэрэссэдээтэлэ Владимир Егоров, Дьокуускайдааҕы көтөр фабрикатын генеральнай дириэктэрин солбуйааччы Алексей Степанов, “Таба” хампаанньа генеральнай дириэктэрэ, Ил Түмэн дьокутаата Александр Слепцов бааллар.
Улахан дьаһал Кубаннааҕы судаарыстыбаннай аграрнай университет базатыгар буола турар. Форум дойду араас муннуктарыттан АПК регионнардааҕы салайааччыларын сэргэ бастыҥ үлэлээх тыа хаһаайыстыбатын тэрилтэлэриттэн уонна бааһынай хаһаайыстыбаларыттан, салаа сойуустарыттан, ассоциацияларыттан бэрэстэбиитэллэри, АПК эйгэтигэр үлэлиир учуонайдары, экспертэри уонна аграрнай үрдүк үөрэх тэрилтэлэрин устудьуоннарын түмэ тарта. Форум кыттыылаахтарын кытта РФ бэрэсидьиэнэ Владимир Путин көрсөрө күүтүллэр.
Үрдүк таһымнаах дьаһал чэрчитинэн тыа хаһаайыстыбатын салааларын, астыыр-таҥастыыр бырамыысыланнаһы, бааһынай хаһаайыстыбалары, кээпэрээссийэни уонна тыа сирин сайыннарыы боппуруостарыгар тиэмэлэринэн секциялар үлэлиэхтэрэ. Форум кыттыылаахтара дойду эдэр учуонайдара АПК эйгэтигэр айбыт, оҥорбут инновацияҕа уонна технологияҕа үлэлэрин быыстапкатыгар сылдьыахтара. Тэрийээччилэр Краснодар өҥ буора саҥа саҕалааһыннары олоххо киллэрэргэ көдьүүстээх былаһаакка буолуоҕар мэктиэлииллэр.
